«Այս պահին ինձ բավարարում է Փաշինյանի պատասխանը, քանզի ավելի քան վստահ եմ, որ «Սասնա Ծռերը» իրենց գործողության օրինականությունը հստակ և միանգամայն գիտակցել են և պատրաստ են եղել ապացուցել իրենց այդ քայլին դիմելու դրդապատճառներն ու իրենց քայլերի օրինականությունը»,- անդրադառնալով «Սասնա Ծռերին» ազատ արձակելու վերաբերյալ հարցին վարչապետի թեկնածու Նիկոլ Փաշինյանի այսօրվա պատասխանին ՝ ասաց «Հիմնադիր խորհրդարանի» մամլո խոսնակ Սյուզան Սիմոնյանը:
Ըստ նրա. «Փաշինյանի բացատրությունն ինձ համար միանգամայն հասկանալի և ընդունելի է Սասնա Ծռերի մասով։ Կարծում եմ՝ այդտեղ խոսքը իրավաբաններինն է և իրավապաշտպաններինը։ Նրանք կգտնեն այնպիսի լուծումներ, որոնք կհանգեցնեն համընդհանուր հանրային համերաշխության հաստատման, որն այնքան անհրաժեշտ է մեզ։ Մյուս քաղբանտարկյալների հարցը կարծում եմ՝ դյուրին է լուծվելու:
Սասնա Ծռերի մասով, ցավոք, եղել են զոհեր, բայց այդ զոհերի մահվան հանգամանքները անհայտ են։ Ես վստահ եմ, որ առնվազն երկու դեպքում Ծռերի գործոնը խիստ կասկածելի է, մեկ դեպքում՝ նույնիսկ բացառելի։
Իսկ մյուս դեպքում էլ պետք է հաշվի առնել հանգամանքները։ Երբ քեզ վրա կրակում են, իսկ դու ասում ես մի կրակիր, բայց նա կրակում է, ու քեզ վիրավորում, կարծում եմ ցանկացած մարդ այդ պահին անկախ իրենից կպաշտպանվեր»:
Արփինե ՍԻՄՈՆՅԱՆ
