ԱՄՆ-ի արտաքին գերատեսչության նոր ղեկավար Մայք Փոմփեոն դաշնակից երկրներին հայտնել է Մերձավոր Արեւելքում Իրանի կողմից գերիշխանություն հաստատելու եւ այս երկրի միջուկային նկրտումների նկատմամբ ԱՄՆ-ի մտահոգությունը:
Նա նաեւ հայտնել է Իրանի հետ 2015 թվականին կնքված միջուկային գործարքից ԱՄՆ-ը դուրսբերելու մտադրությունը:
Համատեղ համապարփակ գործողությունների ծրագրի շուրջ նախագահ Թրամփն իր տեսակետը շատ հստակ է ներկայացրել, ասել է Փոմփեոն Իրանի միջուկային պայմանագրի մասին խոսելով:
«Նախագահը հրահանգել է վարչակազմին ուղղումներ մտցնել պայմանագրի մեջ: Սակայն եթե դա անել չհաջողվի, մենք գործարքից ընդհանրապես դուրս կգանք», ասել է Փոմփեոն:
Գործարքի շուրջ բանակցությունները սկսվելուց ի վեր Իսրայելը շարունակ դեմ է եղել դրան, եւ այսօր վարչապետ Բենյամին Նեթանյահուն գովեստով է խոսում Թրամփի որոշման մասին:
Փոմփեոյի հետ հանդիպման ժամանակ նա ասել է. «Մարդիկ կարծում էին, որ միջուկային գործարք կնքելով, Իրանի ագրեսիան կչափավորվեր, սակայն փաստերը ցույց տվեցին հակառակը, եւ Իրանը փորձում է կուլ տալ մեկ երկիր մյուսի հետեւից: Իրանին պետք է կանգնեցնել: Պետք է կանգնեցնել նրա միջուկային ձգտումները: Մենք հաստատակամ ենք դա անելու հարցում»:
Մանրամասներին կարող եք ծանոթանալ՝ «Ամերիկայի ձայն»-ի կայքում:
