Հայաստանը շահագրգռված է եվրասիական տարածությունում ինտեգրացիոն գործընթացներում: Այս մասին հայտարարել է Հայաստանի նախագահ Արմեն Սարգսյանը Բելառուսի ազգային հեռուստաալիքի հետ զրույցում:
«Եվրասիական տարածությունում մեր պետության համար բացարձակ եղբայրական և բարեկամական երկրներ են: Բացի այդ, այն նաև հսկայական շուկա է Հայաստանի համար, հետևաբար մեր մասնակցությունը եվրասիական տարածությունում հիմնված է մեր ռադիկալ շահերի վրա»,- ընդգծել է նախագահը:
Խոսելով երկրում ներքաղաքական ճգնաժամի մասին՝ Արմեն Սարգսյանն ասել է, որ դա հաղթահարելու համար կա մեկ ճանապարհ՝ սահմանադրական: «Այլ ճանապարհ չկա և չի կարող լինել, որովհետև ոչ մեկ չի կարող և չպետք է Պանդորայի տուփ բացի, երբ մարդիկ չհարգեն սահմանադրությունը»,- ասել է նա:
Նախագահը հիշեցրել է, որ ըստ Հայաստանի Սահմանադրության՝ միայն մեկ տեղ կա, որտեղ կարող է վարչապետ ընտրվել: «Բոլոր տարաձայնությունները պետք է լուծվեն խորհրդարանի շենքում, և, բնական է, Սահմանադրության համաձայն,- ասել է նա:- Ով կընտրվի, ես՝ որպես պետության ղեկավար, կստորագրեմ հրաման՝ այդ մարդուն վարչապետ նշանակելու վերաբերյալ»:
Ընդ որում, Սարգսյանը հայտարարել է, որ չի ցանկանում գնահատական տալ Նիկոլ Փաշինյանի ցույցերին, քանի որ «նախագահի գործը չէ գնահատական տալ առանձին անձանց»: «Իմ դերը նրանում է, որ նրանց բերեմ փոխհամաձայնության և բոլոր հարցերի խաղաղ կարգավորման»,- ասել է Արմեն Սարգսյանը:
Նախագահը նաև նշել է, որ վերջին հաշվով ամենակարևորը ժողովրդի ընդհանուր շահն է: «Վերջին հաշվով ով էլ լինի կառավարությունում, ես թույլ չեմ տա, որպեսզի հաշվի չառնվեն մեր երկրի ու մեր ժողովրդի շահերը»,- ասել է նա:
Պատրաստեց՝ Վիկտորյա ԱՆԴՐԵԱՍՅԱՆԸ
