Aravot.am-ը ստացել է մտահոգություն, թե ինչու են Երեւանի պետական համալսարանում որոշել դեկանների հապշտապ ընտրություններ իրականացնել: Մասնավորապես մեր ընթերցողն ասում է. «ԵՊՀ ռեկտորը շատ արագ եւ հանկարծակի ընտրություններ է կազմակերպում, դրան կարող եք ականատես լինել www.ysu.am կայքում եւ տեսնել, որ էլի ընտրվում են երեսուն տարուց ավելի դեկան աշխատող եւ յոթանասունհինգ տարեկանից բարձր մարդիկ: Նման ընտրություններն իրական սպառնալիք են հասարակության համար, դեկանները վաղուց սպառել են իրենց, սակայն քանի որ ռեկտորին ընտրողներն են, ռեկտորը նրանցից ազատվել չի պատրաստվում»:
ԵՊՀ ռեկտորի մամուլի խոսնակ Գեւորգ Էմին-Տերյանն ասաց, որ Aravot.am-ին թեմայի վերաբերյալ մեկնաբանություն կներկայացվի մայիսի 2-ին:
Հիշեցնենք, որ ԵՊՀ միջազգային հարաբեությունների ֆակուլտետի դեկան է վերընտրվել Գեղամ Պետրոսյանը, վերընտրվել է աշխարհագրության ֆակուլտետի դեկան Մարատ Գրիգորյանը,ԵՊՀ մաթեմատիկայի եւ մեխանիկայի ֆակուլտետը կշարունակի ղեկավարել Արթուր Սահակյանը եւ այլն:
ԵՊՀ 19 ֆակուլտետներից առնվազը կեսում այս տարի դեկանների ընտրություններ կլինեն, 4-ում արդեն ընտրությունը կայացել է:
Գոհար ՀԱԿՈԲՅԱՆ
