Այսօր Ազգային ժողովում հանդիպել եւ մի շարք հարցեր են քննարկել ԱԺ «Ելք» խմբակցության եւ ՌԴ պատգամավորները:
«Քաղաքացիական պայմանագիր» կուսակցության անդամ եւ ԱԺ «Ելք» խմբակցության պատգամավոր Արարատ Միրզոյանը, որը եւս ներկա է եղել հանդիպմանը, Aravot.am-ի հետ զրույցում մի փոքր մանրամասներ ներկայացրեց հանդիպումից: «Փաշինյանն ասել է, որ մեր շարժումը, մեր հեղափոխությունը չունի աշխարհաքաղաքական որեւէ ուղղվածություն, միջամտություն, ենթատեքստ, եւ շարունակելու է կատարել միջազգային իր բոլոր պարտավորությունները:
Բայց սա չի նշանակում, որ բոլոր այդ հարաբերություններում չկան խնդիրներ, սա նշանակում է, որ այս խնդիրները չեն անտեսվելու, բարձրաձայնվելու են, քննարկվելու են եւ կոնկրետ լուծումներ պետք է ստանան»,-ասաց Միրզոյանը:
Մեր հարցին՝ արդյոք ԵԱՏՄ-ին եւ ՀԱՊԿ-ին ՀՀ-ի անդամակցության վերաբերյալ հարց բարձրացվել է, եւ ինչ մտահոգություններ են հնչեցրել ռուս պատգամավորները, Միրզոյանը պատասխանեց. «Ասեմ, որ ռուսական եւ հայկական կողմերը քննարկել են երկուստեք հետաքրքրություններ ունեցող հարցեր, այդ թվում նաեւ այդ կառույցների՝ ՀՀ-ի հետ անդամակցության հարցերը: Նիկոլ Փաշինյանը վստահեցրել է՝ Երեւանը չի հրաժարվի ՀԱՊԿ-ին եւ ԵԱՏՄ-ին անդամակցությունից»:
Նշենք, որ այս հանդիպմանը մասնակցում էին «Ելք»-ից պատգամավորներ Նիկոլ Փաշինյանը, Արարատ Միրզոյանն ու Սասուն Միքայելյանը։ Ռուսական կողմից խումբը գլխավորում է Պետդումայի ԱՊՀ գործերով, եվրասիական ինտեգրման եւ հայրենակիցների հետ կապերի կոմիտեի նախագահ Լեոնիդ Կալաշնիկովը։
Նելլի ԲԱԲԱՅԱՆ
