Ինչպես հայտնի է, վարչապետի ընտրության հարցը Ազգային ժողովում կքննարկվի մայիսի 1-ին:
Ազգային ժողովում չորս խմբակցություն կա՝ Հանրապետական՝ 58 պատգամավոր, Ծառուկյան դաշինք՝ 31 պատգամավոր, Ելք՝ 9 պատգամավոր, Հայ հեղափոխական դաշնակցություն՝ 7 պատգամավոր: Ընդհանուր առմամբ՝ 105 պատգամավոր:
Ըստ Հայաստանի Սահմանադրության 149 հոդվածի
2.Վարչապետի հրաժարական ներկայացնելու կամ վարչապետի պաշտոնը թափուր մնալու այլ դեպքերում Կառավարության հրաժարականն ընդունվելուց հետո` յոթնօրյա ժամկետում, Ազգային ժողովի խմբակցություններն իրավունք ունեն առաջադրելու վարչապետի թեկնածուներ: Ազգային ժողովը վարչապետին ընտրում է պատգամավորների ընդհանուր թվի ձայների մեծամասնությամբ:
3.Վարչապետ չընտրվելու դեպքում քվեարկությունից յոթ օր հետո անցկացվում է վարչապետի նոր ընտրություն, որին մասնակցելու իրավունք ունեն պատգամավորների ընդհանուր թվի առնվազն մեկ երրորդի առաջադրած վարչապետի թեկնածուները: Եթե պատգամավորների ընդհանուր թվի ձայների մեծամասնությամբ վարչապետ չի ընտրվում, ապա Ազգային ժողովն արձակվում է իրավունքի ուժով:
4.Վարչապետի ընտրությունն անցկացվում է անվանական քվեարկությամբ:
Հանրապետական կուսակցությունը արդեն հայտարարել է, որ վարչապետի պաշտոնի համար թեկնածու չի առաջադրելու: Կուսակցության խոսնակ Էդուարդ Շարմազանովը հայտարարել է, որ մինչև քվեարկությունը կորոշեն, թե թեկնածուներից ում օգտին են քվեարկելու:
«Ծառուկյան դաշինքի» մի շարք անդամներ հայտարարում էին, որ հնարավոր է վարչապետի պաշտոնի համար առաջադրեն դաշինքի առաջնորդ Գագիկ Ծառուկյանին: Սակայն վերջինս հայտարարեց, որ իր թեկնածությունը չի առաջադրվելու և սատարելու է Նիկոլ Փաշինյանին:
Ելքը արդեն որոշել է, որ պաշտոնի համար առաջադրելու է Նիկոլ Փաշինյանին: Իսկ Հայ հեղափոխական դաշնակցությունը հայտարարել է, որ պատրաստ է քվեարկել Փաշինյանի օգտին:
Եթե Ծառուկյան դաշինքը, Ելքը և ՀՅԴ-ն քվեարկեն Նիկոլ Փաշինյանի օգտին, նա կստանա 47 ձայն, ինչը Սահմանադրությունով սահմանված ձայների մեծամասնությունը չէ: Հետևաբար, Հանրապետականների ձայները որոշիչ են:
Եթե Հանրապետականը չքվեարկի Նիկոլ Փաշինյանի օգտին, ապա կգործի Սահմանադրության 149 հոդվածի երրորդ կետը՝ Ազգային ժողովը կարձակվի: Կհայտարարվեն Ազգային ժողովի ընտրություններ, իսկ ընտրությունները կանցկացնի Հանրապետականը:
Ամի ՉԻՉԱԿՅԱՆ
