Պետդումայի ԱՊՀ գործերով, եվրասիական ինտեգրման ու հայրենակիցների հետ կապերի կոմիտեի առաջին փոխնախագահ Կոնստանտին Զատուլինը այսօր հայտարարեց, որ Ռուսաստանն ուշադիր կհետևի վարչապետի առաջիկա ընտրություններին եւ չի ընդունի բռնի ուժով հաղթանակի հասած արդյունքները:
«Ով էլ լինի, որը կփորձի խախտել ընթացակարգերը, բռնի կերպով փոխել այդ կարգը՝ ելնելով հեղափոխական նպատակներից եւ այլն, այնպես չէ, որ Ռուսաստանը դա միանշանակ կընդունի: Ստիպված կլինենք անցնել դե ֆակտո հարաբերությունների: Սա ոչ թե սպառնալիք է, այլ պարզապես բացատրություն է, սա իմ անձնական կարծիքն է»,- այսօր «Արմենպրես» ակումբում լրագրողներին ասաց Զատուլինը:
Նա հստակեցրեց, որ նկատի չունի, որ կկասեցնեն դիվանագիտական հարաբերությունները. «Կարծում եմ`ոչ միայն մենք, այլև շատերն իրենք իրենց համար կկշռադատեն, թե արդյոք պետք է օրինական համարել այն կառավարությունը, որը եկել է իշխանության անօրինական ճանապարհով: Նման դեպքում, որպես կանոն, ենթադրվում է հարաբերություններ դե ֆակտո, դե ֆակտո չկա այլ կառավարություն, բայց այն անօրինական է. Դե յուրե կդառնա, եթե մենք համարենք՝ օրինական ընտրված կառավարություն»:
Նա հավելեց, որ «Պարոն Փաշինյանը, պարոն Կարապետյանը, պարոն Ծառուկյանը կամ մեկ ուրիշը, որը կառաջադրվի որպես վարչապետի թեկնածու, եթե հաղթի ընտրությունների արդյունքում, ապա բնական է, որ Ռուսաստանը կաշխատի Հայաստանի նոր կառավարության հետ»:
Արփինե ՍԻՄՈՆՅԱՆ
