«Այն ինչ տեղի ունեցավ, մի օր պետք է տեղի ունենար, ցավոք մենք հետեւություններ չենք անում, որովհետեւ կտրվել ենք մեր իրականությունից: Բարեբախտաբար մեր հասարակությունը եւ հատկապես երիտասարդությունն անտարբեր չէ մեր իրականության նկատմամբ»,- ապրիլի 27-ին «Տեսակետ» ակումբում կայացած ասուլիսի ժամանակ ասաց գեղանկարիչ Հաղթանակ Շահումյանը, հավելելով, որ անտարբերությունը երկիր կառուցելու միջոց չէ:
«Անկախ մեր կրթական համակարգի թերացումներից եւ կործանված վիճակից` հրաշալի երիտասարդություն ունենք` պատրաստված, նվիրյալ եւ վաղվա օրը հենց այդ երիտասարդությունն է կառուցելու»,-հավելեց գեղանկարիչը:
Մանրամասները` տեսանյութում:
Նրա ձեւակերպմամբ, պահը պետք է ճիշտ օգտագործել. «Կգտնվենք բանական, ապագա կունենա մեր երկիրը…Չեմ կարող չնկատել, որ այս անգամ առանձնահատուկ վերաբերմունք եղավ նաեւ իշխանությունների կողմից: Բարեբախտաբար ցավալի դեպքեր չեղան, չեմ ուզում հիշել նախկինում եղածները, իսկ այսօր արդեն հուսադրող պահ կա…Սերժ Սարգսյանի հրաժարականը եւս կոչ էր բոլորին` մի նոր միջավայր ստեղծելու, նախագահն էլ հայտարարեց, որ նոր Հայաստան ստեղծելու ճանապարհին ենք»:
Մանրամասները` տեսանյութում:
Երգիչ, երգահան Եղիշե Պետրոսյանի գնահատմամբ, այն ինչ կատարվում է մեր երկրում, ազգային զարթոնք է. «Շարժմանը հաջողվեց մոբիլիզացնել ողջ հայության ուժը, սա դարձավ համազգային շարժում…Ուսանողությունը ցույց տվեց, որ պատրաստ է տեր կանգնել իր երկրին… Կարող ենք փաստել, որ ազգովին անընդունելի ենք համարում անարդարությունը, ինչի համար էլ ժողովուրդը փողոցներում է, անհանդուրժելի ենք համարում սրա-նրա վասալը լինելու վիճակը»:
Մանրամասները` տեսանյութում:
Մտավորականները կարծում են, որ իշխանությունները պարտավոր են հաշվի նստել ժողովրդի հավաքական կարծիքի հետ: Ինչ վերաբերվում է «դրսից տղա բերելուն», Եղիշե Պետրոսյանը հետեւյալ կերպ է մեկնաբանում. «Եթե կրկին փորձեն շուստրիություն անել, պատասխանատվությունը կընկնի ՀՀԿ-ականների ուսերին… Հիմա Կարեն Կարապետյանին քաջալերել են չգիտեմ որ տեղերից, թեեւ դժվար չէ գուշակել, այժմ ինքը առյուծ է կտրել…Առաջնորդին զոհաբերել են, առաջնորդի հավակնություններ է ցուցաբերում»:
Հաղթանակ Շահումյանը նշում է, որ նախ եւ առաջ վստահության վերականգնման խնդիր կա, բոլոր ժամանակներում ընտրությունները կեղծվել են, ու այժմ մարդիկ չեն վստահի այն ընտրությունների արդյունքներին, որոնք «հներն» իրականացնեն:
Մանրամասները` տեսանյութում:
Գոհար ՀԱԿՈԲՅԱՆ
