«Նիկոլ Փաշինյանը Ազգային ժողովի կողմից պետք է ընտրվի վարչապետ՝ եթե պատգամավորներն իրենց համարում են պետականամետ»,-այս մասին այսօր «Մեդիա կենտրոնում» ասաց Գլոբալիզացիայի եւ տարածաշրջանային հետազոտությունների կենտրոնի ղեկավար Ստեփան Գրիգորյանը:
Նրա խոսքերով՝ «Ես այն հազվադեպ փորձագետներից եմ, որ կանխատեսել էի այս ալիքը, բայց հիմա որ ուսումնասիրում եմ, տեսնում եմ, որ մեր հասարակությունը հասունացած է: Այս կիսանախկին իշխանությունը արժանի չէ կառավարել այս հասարակությունը: Այսպիսի հերոսական պատկեր ցույցերի, շատ ժողովրդավարական երկրներում հազվադեպ եմ տեսել»:
Գրիգորյանը վստահ է՝ եթե չանցկացվի արտահերթ նիստ եւ չքվեարկեն Նիկոլ Փաշինյանի օգտին, կսկսվեն այլ մեթոդներ ցուցարարների կողմից՝ ավելի կտրուկ: Ավելի լավ է այսօր ՀՀԿ-ն քվեարկի Փաշինյանի օգտին: Կարեւոր է Փաշինյանը ընտրվի»:
Ստեփան Գրիգորյանն ասաց՝ ՀՀԿ-ն պարբերաբար խոսում է, որ իրենք պետականամետ են, ուրեմն ՀՀԿ-ն պետականամետ քայլ անի. «Հայաստանը պետք է ունենա վարչապետ՝ ի դեմս Նիկոլ Փաշինյանի, քանի որ ինքը տարավ այս շարժումը, ու գնալ քննարկումներ անել այլ թեմաներով՝ ճիշտ չէ»:
Գրիգորյանը նաեւ նշեց, որ պարտադիր պետք է օրենսդրական փոփոխություններ կատարվեն, նախ՝ ընտրական օրենսգիրքը:
«Ընդդիմությունն այս փուլում պետք է վերցնի գործադիր իշխանությունը, կազմակերպի ընտրություններ, որի արդյունքում նոր կառավարություն կձեւավորվի»:
Վարչապետի ընտրությունները տապալելու ՀՀԿ-ի ծրագրերն, ըստ Գրիգորյանի, իրատեսական չեն:
«Այս շարժումը արհեստական չէ, բնական է, քանի որ կոռուպցիա, մենաշնորհներ, բիզնեսին շնչել չէին տալիս, ու նույն մարդը ուզեց 3-րդ անգամ իշխել, վերջին կաթիլն էր դա: Հասարակությունը ցույց տվեց, որ Հայաստանի Հանրապետությունը չի կարող գնալ բռնապետության ճանապարհով»,-ասաց Գրիգորյանը:
Նելլի ԲԱԲԱՅԱՆ
Լուսանկարը՝ «Մեդիա» կենտրոնի
