Այս պահին Լամբադա կամրջի մոտ մի քանի տասնյակ քաղաքացիներ են հավաքվել, նրանք սպասում են Նիկոլ Փաշինյանին: Այստեղ է նաև հանրահավաքներից հայտնի Իռայի ամուսինը, նա լուսանկարվում է ցուցարարների հետ: Լամբադա կամրջի մոտակայքում են նաև Ավտոլիգայի կոմիտեի անդամները, նրանք մեքենաներով փակել են Կոմիտաս տանող ճանապարհը:
Միաժամանակ բուհերում մեկնարկել է դասադուլը: ԵՊՀ և մի շարք այլ բուհերի ուսանողներ երթով միանում են մյուս ցուցարարներին:
Անհնազանդության գործողություններ են տեղի ունենում մի շարք փողոցներում. ցուցարարները խմբված են նաև Աբովյան փողոցում, փակ է Գարեգին Նժդեհի փողոցը՝ հրապարակից սկսած: Այստեղ ցուցարարները աղբամաններով են փողոցը փակել:
Հիշեցնենք, որ երեկ Նիկոլ Փաշինյանը կոչ արեց նոր թափով իրականացնել անհնազանդության գործողությունները: Մասնավորապես, բոլոր ավտոմեքենաները ժամը 12.05 ամբողջ Հանրապետության տարածքում 20 րոպե կանգնեն և ուղղակի դադարեցնեն երթևեկությունը:
Տաթև ՀԱՐՈՒԹՅՈՒՆՅԱՆ
Լուսանկարները՝ Նելլի ԲԱԲԱՅԱՆԻ
