Aravot.am-ի հետ զրույցում Պաշտպանության նախարարի մամուլի խոսնակ Արծրուն Հովհաննիսյանն անդրադարձավ երեկ Հանրապետության հրապարակում «Ելք» դաշինքի պատգամավոր Սասուն Միքայելյանի հայտարարած տեղեկություններին, թե խաղաղապահ զորքերի մի քանի սպաներ են ձերբակալվել, ինչը, ենթադրաբար, կապված է ժողովրդական շարժմանն աջակցելու հետ:
Հովհաննիսյանը հայտնեց, որ ձերբակալությանը եւ այլ իրավական գործընթացներին առնչվող հարցերին իրավասու չէ պատասխանել (ոստիկանության լրատվական ծառայությունից էլ խորհուրդ տվեցին հենց ՊՆ-ից ճշտել):
«ՊՆ-ն իր գործառույթների շրջանակում ինչ-որ անի, պարտադիր չէ՝ իմանաք»,-արձագանքելով հարցին, թե՝ նախարարությունից խաղաղապահների հանդեպ եղե՞լ են ինչ-որ զգուշացումներ կամ կարգադրություններ, ասաց Արծրուն Հովհաննիսյանը:
Խաղաղապահ զորքերի սպաների հանդեպ հնարավոր ճնշումների առնչությամբ էլ մեր զրուցակիցը վստահեցրեց՝ նման բան չկա. «Ճնշում չի կարող լինել: Ամեն ինչ կարող է լինել միայն օրենքի սահմաններում»:
Լուիզա ՍՈՒՔԻԱՍՅԱՆ
