«Երկիր Ծիրանի» կուսակցության հիմնադիր-ղեկավար, նախկին պատգամավոր Զարուհի Փոստանջյանը քիչ առաջ գնացել էր «Նուբարաշեն» քրեակատարողական հիմնարկ:
«Արմեն Բիլյան, Գեւորգ Սաֆարյան…մոտ հարյուր անձինք այժմ բանտարկված են իրենց քաղաքական հայացքների համար: Հեղափոխությունը պետք է թակի նաեւ այստեղի դռները, քանի որ այս ՔԿՀ-ն շատ քաղհալածյալների է տեսել»,-բարձրախոսով հայտարարեց նա: ՔԿՀ-ի դուռը Զարուհի Փոստանջյանի առաջ, սակայն, չբացեցին:
Նա շարունակում էր բարձրախոսով կոչեր հնչեցնել, երբ նրան մոտեցավ ՔԿՀ աշխատակիցներից մեկը եւ ասաց. «Սա հսկվող գոտի է, չի կարելի այստեղ գտնվել: Դուք ձեր գործողություններով հասարակական անկարգություններ եք հրահրում ներսում, խնդրում եմ՝ դադարեցրեք»:
Զարուհի Փոստանջյանն անդրդվելի էր: Նա կրկին բարձրախոսով դիմեց Գեւորգ Սաֆարյանին, որը, հիշեցնենք, մեղավոր է ճանաչվել «Սեֆիլյանի եւ մյուսների գործով»:
Փոստանջյանն ասաց. «Հավատում եմ, որ գիտես՝ ինչպես է տեղի ունենում հեղափոխությունը Երեւանի փողոցներում: Այն որ դու տարիներ շարունակ բղավում էիր՝ «դուրս եկեք փողոց», այսօր այդ կոչը հնչում է ՀՀ-ում եւ Սփյուռքում: Քիչ է մնացել, որպեսզի ձեզ ազատենք բանտախցերից»:
ՔԿՀ աշխատակիցը զգուշացրեց, որ ոստիկանություն կկանչի…
Զարուհի Փոստանջյանին նույն կերպ հորդորեցին հեռանալ նաեւ «Վարդաշեն» ՔԿՀ-ի մուտքի մոտից:
Լուիզա ՍՈՒՔԻԱՍՅԱՆ
