«Ամեն դեպքում, դա մեծ քայլ էր»,-Սերժ Սարգսյանի՝ վարչապետի պաշտոնից հրաժարականն այսպես է մեկնաբանում ՀՀ ֆինանսների նախարարի ժամանակավոր պաշտոնակատար Վարդան Արամյանը: «Խուսափեցինք բախումներից»,-ասում է նա: Այսօր Ծիծեռնակաբերդի հուշահամալիրում լրագրողների հետ զրույցում նա նշեց՝ ժամանակից առաջ չի ընկնում ու չի կարող ասել՝ կաշխատի՞ նոր իշխանության հետ:
Արտակարգ իրավիճակների նախարարի ժամանակավոր պաշտոնակատար Դավիթ Տոնոյանն էլ Սերժ Սարգսյանի հրաժարականի մասին հետեւյալը շեշտեց. «Եղել է ժողովրդի դժգոհություն, Սերժ Սարգսյանն էլ արձագանքել է դրան՝ հրաժարական տալով»:
Դավիթ Տոնոյանը հավելեց, որ իր համար այնքան էլ սպասելի չէր հրաժարականի լուրը: «Բայց եթե նման որոշում է կայացրել, ուրեմն այն արդարացված է»,-եզրափակեց նա:
Լուիզա ՍՈՒՔԻԱՍՅԱՆ
