«Այն, ինչ տեղի ունեցավ վերջին 10-12 օրերի ընթացքում, 10 հազարների հետևանքն է». Շիրակի մարզպետ

Շիրակի մարզպետ Արթուր Խաչատրյանը, գնահատելով վարչապետ Սերժ Սարգսյանի հրաժարական տալն, ասաց. «Ես կարծում եմ, որ այդ քայլը որոշակի քաղաքական համարձակություն է իր մեջ ենթադրում, որովհետև հասունության դրսևորում է, մանավանդ վերջին տողերը. ընդհանրապես սխալն ընդունելը և քայլ կատարելը, դա խելամտության դիրքորոշում է»։

Հարցին՝ եթե վարչապետ դառնա ժողովրդի թեկնածուն, ինչպես որ առաջարկում է Նիկոլ Փաշինյանը, Դաշնակցությունը՝ որպես ՀՀԿ-ի կոալիցիոն գործընկեր, որտե՞ղ է տեսնում իր տեղը, մարզպետն ասաց, որ այդ հարցին չի կարող պատասխանել, դա իր լիազորություններից վեր է։

«Բայց օգտվելով առիթից՝ բոլորին կոչ եմ անում, լինի արտահերթ ընտրություն, լինի հերթական ընտրություն, ձեռնպահ մնան այդ 10 հազար դրամը վերցնելուց։ Այն, ինչ որ տեղի ունեցավ այս 10-12 օրվա ընթացքում, դա այդ 10 հազար դրամների հետևանքն է, բկներիցս դուրս եկավ, այսինքն՝ ուտողների բկներից դուրս եկավ այդ 10 հազար դրամը»։

Շիրակի մարզպետը նաև ասաց, որ ի սկզբանե Դաշնակցությունը երկխոսության կոչ է արել, որպեսզի կարողանան խաղաղ ու նաև շահեկան ելք գտնել իրավիճակից դուրս գալու։ «Գիտակցենք, որ կան խնդիրներ, որոնք ծագել են, մի օրվա ընթացքում չեն ծագել, երկար ժամանակվա պատմություն ունեն, մի մասն, իհարկե, օբյեկտիվ է, զգալի մասը՝ սուբյեկտիվ է, բայց մեր կոչերը միշտ եղել են՝ նստել բանակցությունների սեղանի շուրջ, հասկանալ՝ որն է խնդիրը։ Եվ հատկանշական է, որ վարչապետի հրաժարականի օրը՝ առավոտյան, Հրանտ Մարգարյանը հանդիպել էր Նիկոլ Փաշինյանի հետ, դրան հետևել էր առաջին փոխվարչապետի հանդիպումը, և դրան հետևեց արդեն վարչապետի հրաժարականը, բայց վերջին 10-12 օրվա ընթացքում մեր գործողությունները, կոչերը միշտ նույնն են եղել՝ խելամտության և կանխելու որևէ հնարավոր բռնություն, սադրանք»,- ասաց մարզպետը։

Նունե ԱՐԵՎՇԱՏՅԱՆ