«Ավրորա» համաշխարհային մարդասիրական նախաձեռնության համահիմնադիր Ռուբեն Վարդանյանը ապրիլի 24-ին Մատենադարանում կայացած միջոցառման ժամանակ հրաժարվեց պատասխանել «Ավրորային» չվերաբերող հարցերին, ասաց, որ այլ հարցերի համար հնարավորություն կստեղծեն ավելի ուշ:
Ինչ վերաբերում է «Ավրորա» համաշխարհային մարդասիրական նախաձեռնությանը, Ռուբեն Վարդանյանը նշեց, որ այս տարի ոչ միայն մրցանակակիրներին են ներկայացնելու, այլեւ առաջին-երկու տարվա հաղթողների արած գործը: Նաեւ մի քանի մասի են բաժանելու իրենց միջոցառումները, քանի որ նկատել են, որ այն բավականին երկար է տեւում: Նա նաեւ հավելեց, որ սպասվում են շատ հյուրեր, ու իրենք ցանկություն ունեն Հայաստանն այնպես ներկայացնել, որ ավելի շատ տեղեկանան մեր երկրի մասին:
Հարցին` Հայաստանում զարգացող իրադարձությունների, ներքաղաքական իրավիճակի պատճառով արդյոք քննարկվել էր միջոցառման հետաձգման հարցը: Նախաձեռնության համահիմնադիր Նուբար Աֆեյանը պատասխանեց, որ ցանկացած իրադարձություն դառնում է իր խոսքով՝ արմատական պատմության փոքր մասը. «Մենք ուրախ ենք, որ ապրիլի 24-ը կլինի հարգանքի օր, հայը հայի դեմ չաշխատելու օր, ուրախ ենք, որ «Ավրորան հաջողում» է հայկական սկզբունքային ազնվությունից»:
Ռուբեն Վարդանյանը չթաքցրեց, որ հետաձգման առաջարկներ եղել են, սակայն իրենք չեն ընկրկել. «Մենք ասել ենք, դա ճիշտ չէ…ասել ենք, որ հարգում ենք, ինչ տեղի է ունենում Հայաստանում, բայց մենք հանուն ապագա սերունդների,.պետք է շարունակենք այդ գործը»:
Գոհար ՀԱԿՈԲՅԱՆ
