«Ես եւ գործընկերներս դեմ ենք քվեարկել Սերժ Սարգսյանի թեկնածությանը եւ այդ կերպ դիրքորոշում հայտնել: Սա անձնավորված հարց է, քվեարկությունն էլ անձնավորված է եղել, ուստի կողմ քվեարկողների կարծիքն իրենցից հարցրեք»,-Ծիծեռնակաբերդի հուշահամալիրում այսօր անդրադառնալով հարցին, թե «դուք ե՞ւս մերժել եք Սերժին», ասաց «Ծառուկյան» խմբակցության պատգամավոր Վահե Էնֆիաջյանը:
Լրագրողները հետաքրքրվեցին՝ ժողովրդական պայքարին երեկ հայտարարությամբ միացած «Ծառուկյան» դաշինքը կմիանա՞ Նիկոլ Փաշինյանի եւ ժողովրդի ներկայացրած ծրագրին, որի շուրջ վաղը բանակցություններ են սկսվելու, Վահե Էնֆիաջյանը պատասխանեց. «Ժողովրդի կամքն է առաջնահերթ, մենք դա ենք կարեւորում»:
Հարցին՝ «եթե ժողովրդի կողմից Նիկոլ Փաշինյանն առաջադրվի որպես վարչապետի թեկնածու, կողմ կքվեարկե՞ք», Էնֆիաջյանն արձագանքեց. «Երբ մեր թիմը վարչապետի փոփոխության հարց քննարկի, դիրքորոշում կհայտնի: Եկեք հասկանանք՝ վաղվա հանդիպմանն ի՞նչ կլինի»:
Ինչ վերաբերում է վաղվա բանակցություններին Գագիկ Ծառուկյանի հնարավոր մասնակցությանը, Վահե Էնֆիաջյանն ասաց. «Նա հասարակության մեջ մեծ վարկանիշ ունի եւ երկրորդ քաղաքական ուժն է ղեկավարում»:
Ապա Վահե Էնֆիաջյանը հայտարարեց՝ «Ծառուկյան» դաշինքը միասնական կերպով թույլ չի տվել (նպաստել է վերջնական որոշման վրա), որ իրենց գործընկերներ՝ պատգամավորներ Նիկոլ Փաշինյանին, Սասուն Միքայելյանին եւ Արարատ Միրզոյանին անձեռնմխելիությունից զրկելու նախաձեռնություն տեղի չունենա:
Լուիզա ՍՈՒՔԻԱՍՅԱՆ
