Հայաստանում չափազանց բարձր տրամադրություն է. մարդիկ ուրախանում են, պարում բարձր երաժշտության տակ՝ տոնելով 11 օրվա բողոքի ցույցերի արդյունքում վարչապետ Սերժ Սարգսյանի հրաժարականը, Human Rights Watch իրավապաշտպան կազմակերպության կայքում գրում է կազմակերպության՝ Հարավային Կովկասի, Եվրոպայի և Կենտրոնական Ասիայի հարցերով տնօրեն Գիորգի Գոգիան։
Գոգիան հիշեցնում է, թե ինչպես են Հայաստանի իշխանություններն արձագանքել 2008թ. մարտին, 2015թ. հունիսին և 2016թ. հուլիսին տեղի ունեցած խաղաղ ցույցերին՝ հետապնդելով ու ծեծի ենթարկելով դրանց մասնակիցներին և խոչընդոտելով լրագրողների աշխատանքը։ Այս անգամ նույնպես առանձին բախումներ եղել են ցուցարարների և ոստիկանության միջև, հարյուրավոր մարդիկ բերման են ենթարկվել, հաճախ՝ կամայականորեն։
Գոգիան գրում է, որ Հայաստանում մարդիկ դժգոհում են կոռուպցիայից, համատարած աղքատությունից, իշխանություններին մոտ կանգնած օլիգարխների սահմանած տնտեսական մենաշնորհներից, ինչպես նաև Հայաստանում ընտրությունների ժամանակ կեղծարարություններից (այդ թվում ձայների գնում և ճնշումներ պետական ծառայողների վրա)։
«Մեկ մարդու (թեկուզ առանցքային մեկի) հրաժարականը չի վերականգնի հասարակության վստահությունը։ Իշխանությունները պետք է լուրջ աշխատանք տանեն հասարակական բողոքի պատճառ դարձած օրինական պահանջներին լուծում տալու համար։ Նրանք պետք է ապահովեն ժողովրդավարական ընտրություններ, պատասխանատու կառավարություն և ստեղծեն անկախ և ուժեղ պետական ինստիտուտներ, որոնք կկարողանան պատասխան տալ դժգոհություններին՝ նախքան մարդիկ դուրս կգան փողոց»,- կարծում է Գոգիան։
Պատրաստեց՝ Վիկտորյա ԱՆԴՐԵԱՍՅԱՆԸ
