ԵԿՄ նախագահ Մանվել Գրիգորյանի խորհրդական Վարդան Վարդանյանը Aravot.am-ի հետ զրույցում հերքեց լուրը, թե երեկ երեկոյան Էջմիածնի ԵԿՄ տարածքային բաժանմունքի փոխնախագահ Նվեր- Արմեն Հովհաննիսյանին (լուսանկարում) դանակահարել է ցուցարարներից մեկը:
Կրծքավանդակի հատվածում մահացու վիրավորում ստացած Նվեր Հովհաննիսյանը, ըստ Վարդան Վարդանյանի, ցուցարարների հետ որեւէ միջադեպ չի ունեցել:
Ըստ մեր զրուցակցի, Սերժ Սարգսյանի հրաժարականից հետո, ԱԺ նախկին պատգամավոր Հակոբ Հակոբյանը՝ «Ճոյտը», իր մի քանի կողմնակիցների հետ սադրանքների է դիմել. «Հրապարակում հավաքված մարդիկ տոնում էին իրենց հաղթանակը, «Ճոյտը» իր 10-15 կողմնակիցներով ցուցարարներին կոչ է արել՝ գնալ, ազատագրել քաղաքապետարանը, գրոհ են կազմակերպել: Արմենն էլ այդտեղ է եղել, պետական գույքի, շենքի պահպանման համար խուժանների դեմ է դուրս եկել, դանակահարվել է, որեւէ ցուցարար այստեղ կապ չունի: Դեպքը եղել է Սերժ Սարգսյանի հրաժարականից հետո: Հիմա չի կարելի թույլ տալ, որ նա ու իր քրեական տարրերը որոշեն՝ ով է մեղավոր, եթե ինչ-որ խնդիրների վերաբերյալ կասկածներ կան, իրավական դաշտում պետք է քննարկվեն»:
Վարդան Վարդանյանի խոսքով, դանակահարողը «Ճոյտը» չի եղել, եղել է նրա կողմնակիցներից մեկը:
Հակոբ Հակոբյանից դեռ չի հաջողվել մեզ մեկնաբանություն ստանալ, նրա պարզաբանումը՝ առաջիկայում:
Արփինե ՍԻՄՈՆՅԱՆ
