«Ելքի» պատգամավոր Արարատ Միրզոյանը այսօր Հանրապետության հրապարակում վառեց այն գունավոր ծխարձակիչներից, որն այրել էին նաեւ ԱԺ-ում՝ որպես ազատության ջահ:
Արարատ Միրզոյանի խոսքով՝ «ՀՀԿ-ն դեռ դիմադրելու է, ժողովուրդ, ես ձեզ եմ հարցնում, գնալո՞ւ եք մինչեւ վերջ: Հասկանում ենք, չէ՞, որ ՀՀԿ-ն ՀՀ-ում իշխանություն չի լինելու»:
Նա ասաց, թե ինչ է լինելու առաջիկայում եւ վստահեցրեց, որ եթե չանեն՝ մարդիկ թող պահանջեն. «Օլիգարխները, բիզնեսմենները, պետական իշխանության մեջ ներգրաված չեն լինելու: Պետական իշխանության մեջ ներգրաված մարդիկ բիզնես արտոնություններ չեն ունենալու, ժողովուրդը ստեղծարար, ազատ է լինելու: Մենք պիտի կարգավորենք Ընտրական օրենսգիրքը եւ ամբողջ ընտրական համակարգը: ՀՀ-ում այսուհետ պիտի լինեն միայն ու միայն ազատ, արդար ու թափանցիկ ընտրություններ: Իշխանությունը ՀՀ քաղաքացիներից այլեւս երբեք չպիտի խլվի:
Իշխանությունը ժողովրդինն է եւ այն իրացնելու է ժողովուրդը ընտրությունների միջոցով: Մենք պիտի քաղաքականությունը դուրս բերենք դպրոցներից ու մանկապարտեզներից: Դպրոցների դասատուները, տնօրենները, մանկապարտեզների դաստիարակները պիտի միայն զբաղվեն երեխաների կրթությամբ ու դաստիարակությամբ: Մեր բուհերը, որ դարերով հայտնի է եղել՝ որպես կրթության առաջատար, հիմա կիլոմետրերով հետ է աշխարհից: Մենք պիտի բուհերը զարգացնենք ու պիտի սկսենք նրանից, որ ԵՊՀ ռեկտորն իշխանության առաջ չպիտի խոնարհի»:
Նա ասաց, որ առողջապահական նորմալ համակարգ պիտի ձեւավորեն, ոլորտ առ ոլորտ, քայլ առ քայլ պետք է կերտենք մեր երազանքների Հայաստանը:
Հռիփսիմե ՋԵԲԵՋՅԱՆ
