«ՀՀ-ն խաղաղ, առանց զենքի հավաքների իրավունքը ճանաչում է եւ հետամուտ է լինելու այդ իրավունքի հարգմանը»,- քիչ առաջ կայացած մամուլի ասուլիսում հայտարարեց ՀՀ արդարադատության նախարար Դավիթ Հարությունյանը՝ հավելելով, որ միաժամանակ, հավաքները կարգավորվում են օրենսդրությամբ եւ նախատեսում են որոշակի գործընթացներ՝ օրինականության պահպանման համար: Ասաց՝ վերջին օրերին այդ գործընթացները չեն պահպանվել:
«Չնայած դրան, անգամ ոչ օրինական՝ առանց իրազեկման հավաքները, եթե դրանք խաղաղ են, կարող են իրականացվել, ոստիկանները այդ իրավունքի իրականացմանն աջակցում են, բայց սա չի նշանակում, որ պատասխանատվություն չի առաջանում»,- հավելեց Դավիթ Հարությունյանը:
Նա նաեւ նշեց, որ միաժամանակ կան դեպքեր, որ խաղաղ հավաքը կարող է ոստիկանության կողմից դադարեցվի: Դա այն դեպքերն են, որ անհամաչափ խախտվում են այլոց սահմանադրական իրավունքները եւ հանրային շահերը: «Եթե հավաք կամ երթ է անցկացվում, բնական է, որ ճանապարհային, հետիոտնային երթեւեկությունը կարող է խաթարվել, սա երկրորդային էֆեկտ է, որը անհամաչափ չի սահմանափակում այլոց իրավունքը, բայց երբ հավաքի նպատակն է՝ պարալիզացնել երթեւեկությունը՝ սա անհամաչափ սահմանափակում է: Գիշերային ժամերին անհամաչափ աղմուկը, որը կարող է իրականացվել շենքերի բակերում եւ այլն, կարող է դիտարկվել այլոց իրավունքների անհամաչափ սահմանափակում»,- մանրամասնեց Դավիթ Հարությունյանը:
Երեկ ոստիկանությունը որոշում է կայացրել՝ դադարեցնել այն հավաքները, որոնք այլոց իրավունքների անհամաչափ սահմանափակում են: Նման որոշում կայացնելուց հետո հավաքը պետք է դադարեցվի եւ ոստիկանության որոշմանը չենթարկվելու ցանկացած քայլ՝ քրեորեն պատժելի է:
Նախարարն ասաց, որ երեկ հանրահավաքում հնչել են միայն խաղաղ հավաքի կոչեր: Ինքը դա ողջունում է:
Նելլի ԳՐԻԳՈՐՅԱՆ
