Այսօր Գյումրու պատմության մեջ տեղի ունեցավ թերևս ամենամարդաշատ հանրահավաքը․ Շիրակի մարզի, ինչպես նաև Վանաձորի տարբեր գյուղերից մարդիկ եկել էին Գյումրի՝ ցուցարարներին միանալու ու իշխանափոխության պահանջ ներկայացնելու։
Ինչպես արդեն տեղեկացրել ենք, Գյումրիում երթը գլխավորում էին Շիրակի թեմի հոգևորականները, նրանք առաջին շարքերում էին․ եկել էին հատուկ այն նպատակով, որպեսզի որևէ մի անախորժ միջադեպ տեղի չունենա ցուցարարների ու ոստիկաների միջև։ Շիրակցի հոգևորականներն այսօր տարբեր հավաքների ելույթներ են ունեցել՝ արտահայտելով նաև իրենց անձնական կարծիքը կատարվող իրադարձությունների շուրջ։
Ցուցարարները քայլերթով շարժվեցին դեպի կայարան, կանգնեցին ոստիկանության «Կումայրի» բաժնի դիմաց՝ ոստիկաններին հորդորելով միանալ իրենց։ Նրանք նաև հիշեցրեցին, որ ավտոերթին մասնակցած և ոչ մի վարորդի իրավունք չունեն խուլիգանության հոդվածով ձերբակալելու, ինչպես որ արել են Տնտեսագիտական համալսարանի դասախոս Ղարիբ Հարությունյանի դեպքում։
Այնուհետ նրանք շարժվեցին դեպի դատարան, որտեղ կանգնելով՝ դատավորից, որը պետք է քննարկի Ղարիբ Հարությունյանի խափանման միջոցը, պահանջեցին ազատ արձակել նրան։
Այստեղ երթևեկությունը կաթվածահար եղավ, մեքենաների վարորդները փակեցին փողոցը, ի նշան բողոքի՝ ազդանշաններ հնչեցնելով։
Ցուցարարները, որոնց թիվը երեկոյան զգալիորեն ավելացել էր, դարձյալ հավաքվեցին Թատերական հրապարակում։ Հավաքը վարող Կարեն Պետրոսյանը ցուցարարներին փոխանցեց Շիրակի թեմի առաջնորդ Միքայել եպիսկոպոս Աջապահյանի խոսքերը։ Նա ասել է « կվերադառնամ, եթե ժողովուրդը ինձ պահանջի, եթե պետք եմ ժողովրդին»։ Կարեն Պետրոսյանը հիշեցրեց նաև Ախուրյանում զինվորի հուղարկավորության հետ կապված դեպքը, որից հետո շատերը քննադատել էին Սրբազանին։ Կարեն Պետրոսյանը սա որակեց որպես խառնակիչների ձեռքի գործ։
Ցուցարարները հորդորեցին Սրբազանին միանալ իրենց՝ բացականչելով «Սրբազան, Սրբազան»։ Հիշեցնենք, որ Միքայել եպիսկոպոս Աջապահյանն ամենանեղ պահերին միշտ եղել է ժողովրդի կողքին, Ախուրյանում զինվորի հուղարկավորությունը եկեղեցական կարգով անցկացնելու խորհուրդ չտալուց ու այս պատճառով քննադատության արժանանալուց հետո, նա հրաժարվել էր թե՛ «Գյումրին առանց տնակների» հիմնադրամի հոգաբարձուների խորհրդի նախագահ լինելուց և թե՛ հեռուստաեթերով հաղորդումների մասնակցելուց։
Նունե ԱՐԵՎՇԱՏՅԱՆ
