ԱԻՄ ՅԱՅՏԱՐԱՐՈՒԹԻՒՆԸ ՆԻԿՈԼ ՓԱՇԻՆԵԱՆԻ եւ ԱՋԱԿԻՑՆԵՐԻ ՀԵՏԱՊՆԴՈՒՄՆԵՐԻ ՎԵՐԱԲԵՐԵԱԼ
Դեռեւս կոմունիստական ամբողջատիրութեան տարիներից յանուն մարդու եւ ազգի իրաւունքների պայքարում առաջատար դերակատարութիւն ունեցած ԱՄԿ-ԱԻՄ-ը խստօրէն դատապարտում է Հայաստանի քաղաքացիների եւ հայ ժողովրդի քաղաքական իրաւունքների պաշտպանութեան եւ իրացման առաջամարտիկ Նիկոլ Փաշինեանի եւ նրա համախոհների ձերբակալումներն ու տարատեսակ հետապնդումները։
Պատմութեան ատեանի առջեւ Սերժ Սարգսեանն ու նրա աջակիցները պատասխանատու են համարուելու ոչ միայն ստախօսութեան, այլեւ այս օրերի բռնարարքների համար։ Նա իր իշխանատենչութեամբ քաղաքացիներին պաշտպանելու կոչուած ոստիականութեանը ստիպում է բռնանալ նոյն քաղաքացիների վրայ։ Սերժ Սարգսեանի «քաջագործութիւնների» թւում են՝ Հայաստանում սահմանադրականութեան ոչնչացումը, ժողովրդին կեղծիքիներով ու այլընտրանքի ուրացումով նրան իսկ իրաւազրկող սահմանադրուեան պարտադրումը, ընտրութիւնների կեղծումը, ազգային անվտանգութեան, ընկերային-տնտեսական վիճակի վատթարացումը եւ այլն, եւ այլն։
Նիկոլ Փաշիինեանն այսօր խորհրդանշում է հայ ժողովրդի եւ Հայաստանի քաղաքացիների արժանապատւութիւնը, քաղաքական եւ քաղաքացիական իրաւունքները։ Նրան եւ իր աջակիցներին ազատազրկելով իշխանութիւնները պատերազմ յայտարարեցին հայ ժողովրդին։ Դա նաեւ մարտահաւէր է քաղաքակիրթ աշխարհին, ինչը կարող է շատ ծանր հետեւանքներ ունենալ Հայաստանի Հանրապետութեան համար։
Սեփական ժողովրդի դէմ կռուողը դատապարտուած է։ Իշխանութիւնների այսօրուայ պահուածքը անառարկելիօրէն ողջ ժողովրդին եւ քաղաքակիրթ աշխարհին մէկ անգամ եւս ապացուցեց, որ այսօրուայ քրէաօլիգարխիկ իշխանութիւնը պարտաւոր է ժամ առաջ հեռանալ իշխանութիւնից։
ԱԻՄ նախագահութեան անունից Պարոյր Հայրիկեան
