ԱՐՄԵՆՊՐԵՍ: Հայաստանի երգչախմբային ընկերության նախագահ Դավիթ Ղազարյանն ուղերձով կոչ է արել զգոն լինել, խուսափել բախումներից և սադրիչներից: Այս մասին «Արմենպրես»-ին տեղեկացրին Հայաստանի երգչախմբային ընկերությունից:
«Մեր ժողովրդի պատմության քառուղիներում հաղթահարել ենք շատ դժվարություններ, բայց արդեն 10 օր է, որ քաղաքամայր Երևանը, նաև հանրապետությունը ցնցումների մեջ են: Խաթարվել է մեր ժողովրդի բնականոն կյանքը:
Հանրապետության նախագահն ու վարչապետը Նիկոլ Փաշինյանին առաջարկում են երկխոսության նստել սեղանի շուրջ: Անհրաժեշտ է հարգել մեր երկրի հեղինակությունը»,- նշել է Դավիթ Ղազարյանը՝ հավելելով, որ պետք է զգոն լինել, խուսափել բախումներից, սադրիչներից և մեր արտաքին թշնամուն չուրախացնել մեր երկրում տիրող իրավիճակով:
Նա նշել է, որ երկու օրից հայ ժողովուրդը ոգեկոչելու է Մեծ եղեռնի 103-րդ տարելիցը: «Մեր հարգանքի տուրքը պետք է բերենք մեր նահատակներին, խոնարհվենք Եղեռնի հուշարձանի առջև: Խոհեմություն, իմաստնություն և խաղաղություն եմ մաղթում մեր երկրին և ժողովրդին»,- եզրափակել է երգչախմբային ընկերության նախագահը:
