Հոգեւորականների առաջնորդությամբ շարժվող երթի մասնակիցներին Մաշտոցի պողոտայում դիմավորեցին ոստիկանները՝ պատնեշ կազմած: Նրանք թույլ չեն տալիս այլեւս առաջ շարժվել եւ մտնել հրապարակ. «Մենք խորհուրդ ենք տալիս գնալ տներով»:
Ոստիկանությունից տեր հորը փոխանցեցին, որ հանգստացնի ժողովրդին եւ ուղարկի տուն. «Խոսքը չի վերաբերում խաղաղ հավաքներին, խաղաղ հավաք այլեւս գոյություն չունի: Խաղաղ հավաքների անվան տակ իրականացվում են վարչական եւ այլ խախտումներ: Մենք հորդորում ենք ձեզ գնալ տներով, ենթարկվել օրենքին, ենթարկվել կարգուկանոնին»:
Ցուցարարները ոստիկաններին ասացին, որ ովքեր սադրում են, հավաքի մասնակիցների հետ կապ չունեն, իսկ ոստիկանության ներկայացուցիչը պատասխանեց, որ հավաքի պատասխանատվությունը կրում են կազմակերպիչները, թող իրենք մտածեն դրա մասին»:
Ցուցարարներն ասացին՝ «մենք չունենք առաջնորդ, մենք ժողովուրդ ենք, խաղաղ ցուցարարներ, ուզում ենք ապրել ազատ, անկախ երկրում»: Ոստիկաններն էլ արձագանքեցին՝ «դուք հենց այդպիսի երկրում էլ ապրում եք»:
Հռիփսիմե ՋԵԲԵՋՅԱՆ
