«Բրդեք մինչեւ Արեշ, ես Արեշ եմ ապրում». Ցույց անող Արեշցի Սիլվային բերման ենթարկեցին

Մաշտոց-Պուշկին խաչմերուկում դեռ լարված իրավիճակ է: Վարորդները մեկը մյուսի հետեւից կայանում են խաչմերուկում եւ առաջ չեն շարժվում:

Մի կին վարորդ, որը, ինչպես հետո պարզվեց, արեշցի Սիլվան էր, ասաց, որ հատուկ է եկել փողոցի այդ հատված. «Ճանապարհը փակել եմ ու ցույց եմ անում»: Նա ասաց, որ իր ցույցով պահանջում է, որ «ոստիկանների պապան հեռանա»:

Մոտ երկու տասնյակ ոստիկաններ փորձեցին ձեռքերով բարձրացնել մեքենան՝ այդ կին վարորդն ու 2 ուղեւորներն էլ մեջը, սակայն վարորդը զայրացած դուրս եկավ մեքենայից եւ ասաց. «Ես՝ իմ գույքը, հանգիստ ցույց եմ անում, ինչի՞ եք խանգարում»: Նա հորդորեց իր մեքենան ճոճող ոստիկաններին, որ «բրդեք մինչեւ Արեշ, ես Արեշ եմ ապրում»:

Ավելի ուշ նա տեղեկացավ, որ ոստիկանները, իր մեքենան հրելիս պետհամարանիշները պոկել են, կոտրել են. «Համարս որ պոկել եք, ո՞վ ա պատասխան տալու»: Նա հաշիվ պահանջեց ոստիկաններից: Վերջիններս վստահեցրին, որ իրենք պատասխանատու են արածի համար:

Ավելի ուշ Սիլվային բերման ենթարկեցին:

Հռիփսիմե ՋԵԲԵՋՅԱՆ