Ինչպես հայտնել ենք, այսօր Արտաշատում լարված իրավիճակ էր: Սերժ Սարգսյանի վարչապետության դեմ բողոքի ցույց է մեկնարկել եւ համայնքի մի խումբ բնակիչներ մեքենաներով երթ էին կազմակերպել: «Քաղաքացիական պայմանագրի» անդամ, Նոր Կյանք գյուղի համայնքապետ Գարիկ Սարգսյանը իր մեքենան կայանել էր ճանապարհին՝ որպես բողոքի նշան:
Երբ ոստիկանները ավտոքարշակի միջոցով տարհանեցին գյուղապետի մեքենան, տեղի ունեցավ միջադեպ, որը նկարահանող «Ազատության» թղթակից Արուս Հակոբյանի աշխատանքը խոչընդոտելով՝ ներկաներից մեկը հարվածեց նրա դեմքին եւ տեսախցիկին: Ըստ Արուս Հակոբյանի, ամենայն հավանականությամբ, հարվածողը քաղաքացիական հագուստով ոստիկան է, քանի որ ոստիկանները որեւէ գործողություն չարեցին նրա դեմ:
Մեր տեղեկություններով, բռնություն գործադրողը ՀՀԿ պատգամավոր Արայիկ Գրիգորյանի թիկնազորից է:
Նրան համայնքի բնակիչներից ճանաչողներ են եղել եւ տեղեկացնում են, որ այդ նույն անձը վաղ առավոտից քաղաքապետարանի մոտ է մարդկանց ահաբեկել:
Հռիփսիմե ՋԵԲԵՋՅԱՆ
Հ. Գ. Ավելի ուշ հայտնի դարձավ, որ լրագրողին հարվածողը Արթուր Ղազարյանն է՝ «Արտաշատ» ջրօգտագործողների ընկերության տնօրենը:
