Երևանում անցկացվում է Արևելյան Եվրոպայի երկրների կրոնական նշանակության Համաշխարհային ժառանգության հուշարձաններին նվիրված տարածաշրջանային թեմատիկ խորհրդակցություն-հանդիպում։ Խորհրդակցության երկրորդ օրվա ավարտին ընդունելով մասնակից երկրների ներկայացուցիչներին, նախարար Արմեն Ամիրյանը տպավորությունը փոխանցեց, որ մեկնարկը շատ հաջող է, և չի կասկածում՝ այդպես է լինելու նաև շարունակությունը։
Նախարարը ներկաներին փոխանցեց նաև մասնակից երկրների մշակութային ժառանգության էլեկտրոնային միասնական պորտալ ստեղծելու իր առաջարկը.
«Դա երկարատև աշխատանք է, հասկանում եմ, որ 1-2 տարվա գործ չէ, բայց նման տեղեկատվությունը հանրամատչելի մեկ շտեմարանում կուտակելն անգնահատելի կարևորություն ունի, և այն ոչ միայն այս 15 երկրների, այլև մշակույթի համաշխարհային ժառանգության ամենակարևոր շտեմարաններից մեկը կարող է դառնալ»։
Հանդիպում-խորհրդակցությունը Երևանում ՀՀ մշակույթի նախարարությունն անցկացնում է ՀՀ արտաքին գործերի նախարարության և ՅՈՒՆԵՍԿՕ-ի հայաստանյան ազգային հանձնաժողովի հետ ՝ ՅՈՒՆԵՍԿՕ-ի Համաշխարհային ժառանգության հիմնադրամի աջակցությամբ:
Համաշխարհային ժառանգության կենտրոնի, ԻԿՕՄՕՍ-ի, Բնապահպանության միջազգային միության, Հունաստանի, Ռուսաստանի, Ուկրաինայի, ՆՀ Մակեդոնիայի, Վրաստանի, Լեհաստանի, Ֆինլանդիայի, Ռուս ուղղափառ եկեղեցու, Սուրբ Աթոռի ներկայացուցիչները կներկայացրին իրենց պատկերացումները կրոնական նշանակության Համաշխարհային ժառանգության հուշարձանների կայուն կառավարման վերաբերյալ:
Երևանյան խորհրդաժողովի ավարտին մասնակիցներն առաջարկների հայտարարություն ընդունեցին ( զետեղվելու է Մշակութային ժառանգության համաշխարհային կոմիտեին ներկայացվելիք զեկույցում)։ Փաստաթղթում ներառված է նաև նախարար Ամիրյանի առաջարկը՝ համապատասխան էլեկտրոնային շտեմարան ստեղծելու շուրջ։
ՀՀ մշակույթի նախարարության հաղորդագրություն
