«Հեռավոր մարզերից մեկում երեք երիտասարդի բերման են ենթարկում ոստիկանական բաժին: Տղաներն ասում են՝ «ոչ մի բան չենք խոսելու, մինչեւ հանրային պաշտպանի չհրավիրեք»:
Բաժնում մշակութային շոկ է լինում, քանի որ մինչ այդ բերման ենթարկված որեւէ մեկը երբեւէ հանրային պաշտպան պահանջած չի լինում: Սա նշանակում է, որ մարդկանց իրավագիտակցությունը բարձրացել է»,-վարչապետ Սերժ Սարգսյանի եւ ՀՀԿ-ի դեմ հանդես եկող ցուցարարների այսօրվա հանրահավաքում հայտարարեց Նիկոլ Փաշինյանի ղեկավարած «Քաղաքացիական պայմանագիր» կուսակցության վարչության անդամ, Երեւանի ավագանու Ելք խմբակցության անդամ Արայիկ Հարությունյանը:
Նա ցուցարարներին հիշեցրեց, որ ոստիկանական բաժանմունք տարվելուց հետո պարտադիր է փաստաբանի պահանջելը:
«Մի թողեք, որպեսզի իրենց լուսանկարեն, ձեր տվյալները մի հայտնեք: Այսքանը, եթե անեք, շատ արագ կմիանաք ձեր ընկերներին, ինչպես այսօր է եղել»,-խորհուրդ տվեց Արայիկ Հարությունյանը: Նա նաեւ նշեց՝ ցուցարարները բողոքում են, որ բուհերի ու դպրոցների դռները փակում են իրենց առաջ: Այս պարագայում Հարությունյանն առաջարկեց Ոստիկանության տեղեկատվական համակարգը կաթվածահար անել իրավական մեխանիզմով:
«Դպրոցներն ու բուհերը փակելը օրենքով նշանակում է պատանդ վերցնել: Երբ չեք կարողանում բուհից կամ դպրոցից դուրս գալ, զանգեք 1-02 ու ասեք, որ ձեզ պատանդ են վերցրել: Հավաստիացնում եմ, որ տասնյակ զանգերից հետո բոլոր դռները բացվելու են»,-վստահեցրեց Արայիկ Հարությունյանը: Նաեւ տեղեկացրեց՝ վաղն իրենց աջակիցները Բեռլինում, Բրյուսելում՝ Եվրոպական խորհրդարանի առաջ, եւ Աթենքում ցույցեր են կազմակերպելու:
Լուիզա ՍՈՒՔԻԱՍՅԱՆ
