«Իմ քայլը» նախաձեռնության անդամ, ԱԺ պատգամավոր Արարատ Միրզոյանը Հանրապետության հրապարակում ասաց, որ ժողովուրդը ոտքի է ելել վերադարձնելու գողացված ուզուրպացված իշխանությունը. Հայաստանում արմենբաշի չի լինելու:
Մեր հեղափոխությունը տոտալ մասնակցություն եւ աջակցություն ունի Հայաստանի քաղաքացիների կողմից, մեր շարժման աշխարհագրությունը Աշոցքից մինչեւ Մեղրիի է: Հայաստանի տասնյակ վայրերում տեղի են ունենում անհնազանդության գործողություններ: Դպրոցներում անգամ, որոշ տնօրեններ են հանում Սերժ Սարգսյանի լուսանկարը ասելով՝ մեկա երեխաներն են հանելու:
Մեզ հասած տեղեկություններով բուհերում այսօր դասի չեն մասնակցել տասնյակ հազարավոր ուսանողներ, բուհերը դատարկ են: Բուհերում են միայն ուսխորհուրդիկները եւ բազեիկները»:
Արարատ Միրզոյանը նաեւ ասաց, որ իրեն երեկ մի բարձրաստիճան պաշտոնյա է մի կողմ քաշել եւ ասել, որ «ներսում ձեր հետ են բոլորը, բոլորը բոլորը, ասեց միայն թե մի քիչ էլ դիմացեք, կանգնեք, մի քիչ էլ կանգնեք»:
«Սկսել են լուրեր հասնել, որ մարդիկ հրապարակավ շպրտում են իրենց ՀՀԿ տոմսերը, այստեղ պետք է դնեք աղբարկղ, որ մարդիկ հազարներով բերեն շպրտեն այդ կեղտը»:
Պարոն Միրզոյանը նաեւ ասաց, որ ոստիկանների մեծ մասն էլ իրենց հետ են, եւ նրանք պետք է հրաժարվեն երիտասարդներին ծեծելու եւ բերման ենթարկելու իրենց գործելաոճից: Արարատ Միրզոյանն ասաց, որ նրանց հետ պատրաստ են բանակցել մի թեմայով միայն՝ Սերժ Սարգսյանի եւ հանրապետական կուսակցության կապիտուլյացիայի:
Լուսինե ԲՈՒԴԱՂՅԱՆ
