Արշակունյաց պողոտայում վարորդները մեկը մյուսի հետեւից շրջում են իրենց մեքենաները երթեւեկելի գոտում ու կայանում: Ոստիկանները հերթով դուրս են բերում մեքենաները կամ վարորդներին: Մեքենաներից մեկի վարորդին՝ Միքայել Ավետիսյանին բռնի ուժով մեքենայից դուրս բերելով՝ տարան ոստիկանության Շենգավիթի բաժին:
Մեքենաներից մեկը, որը դարձյալ այսպես ասած «թարս» էր կայանել, ոստիկանները մոտեցան, փորձեցին բացել դռները, վարորդը ստիպված քշեց եւ անցավ:
Ավելի ուշ Nissan մակնիշի մի մեքենա, որի վարորդը կին էր՝ Ինեսսա անունով, շրջեց իր մեքենան եւ հրաժարվեց շարժվել: Ոստիկանները սկզբում մտան նրա մեքենան, փորձեցին կին վարորդին բռնի դուրս բերել, հետո որոշեցին համոզելով դա անել: Վարորդն ասում էր՝ իմ մեքենայի բոլոր դռները փակեք, դուրս գամ, ոստիկանները դռներից մեկը փորձում էին բաց պահել, որ չենթարկվելու դեպքում մտնեին մեքենա եւ դուրս բերեին վարորդին:
Ոստիկաններից մեկը հորդորեց՝ «Հանենք գցենք դուրս»: Այնուամենայնիվ, մի որոշ ժամանակ բանակցություններից հետո վարորդն ինքնակամ հեռացավ՝ ծափերի ու սուլոցների ներքո:
Հռիփսիմե ՋԵԲԵՋՅԱՆ
