Նիկոլ Փաշինյանը ցուցարարների մի մասի հետ Մալաթիայում է: Նա ցուցարարներին կոչ արեց մի պահ կանգնել եւ հարգել Վահան Զատիկյանի հիշատակը, նաեւ բոլոր կռված տղաների, իսկ ողջ ու առողջ ազատամարտիկներին կոչ արեց հարգանքի տուրք մատուցել:
Իսկ Արշակունյաց պողոտայում, ինչպես հայտնել ենք, վարորդներից մեկը շրջեց իր մեքենան փողոցի լայնությամբ եւ հրաժարվեց շարժվել: Ճանապարհային ոստիկանությունը վարորդին զգուշացրեց, որ հատուկ միջոցներով մեքենան դուրս կբերեն՝ վարորդին էլ մեջը: Սակայն նրա ակցիային միացավ մի նոր մեքենա՝ «Մերսեդես» մակնիշի: Այս մեքենայի վարորդը նույնպես երթեւեկելով պողոտայով՝ շրջեց իր մեքենան հորիզոնական դիրքով ու կայանեց:
Քիչ անց երկու ավտոքարշակ բերեց ոստիկանությունը: Քարշակների օգնությամբ երկու մեքենաները դուրս բերեցին, սակայն երրորդ մեքենան շրջվեց եւ նույն հորիզոնական դիրքով փակեց փողոցը: Ոստիկաններին հաջողվեց մտնել նրա մեքենան եւ վարորդին դուրս բերել մեքենայից:
Վարորդը տարեց մարդ էր, ասաց, որ Գառնիկ Իսրայելյանն է, քաղաքացիություն չունի: Նրան տեղափոխելով փողոցի այլ հատված՝ մի խումբ ոստիկաններ ձեռք ու ոտքը բռնելով՝ բռնի ուժով, քաշքշելով փորձեցին մտցնել ոստիկանական մեքենա: Վարորդի ինքնազգացողությունը վատացավ, նա ուշագնաց եղավ:
Ցուցարարները հորդորեցին ոստիկաններին շտապօգնություն կանչել, բաժին չտանել, այնուամենայնիվ, նրան մտցրեցին մեքենա:
Հռիփսիմե ՋԵԲԵՋՅԱՆ
