Հանրապետության հրապարակում Սերժ Սարգսյանի եւ ՀՀԿ-ի դեմ հանդես եկող ցուցարարների հավաքում այսօր Երեւանի ավագանու «Ելք» խմբակցության անդամ Արայիկ Հարությունյանը դիմեց նրանց. «Մի տատիկ այսօր զանգել էր ինձ ու ասում՝ «թոռս եկել է Երեւան, կարո՞ղ է իմանաս՝ որտե՞ղ է»: Իրավապահների հետ խնդիր ունենալու դեպքում կապվեք ինձ հետ 093 39 40 90 համարով»:
Հանրահավաքի եկած դերասան Սերգեյ Դանիելյանը եւս ասելիք ուներ ցուցարարներին. «Քանի տարի է՝ ձեր հաշվին եմ ապրում, որովհետեւ իմ «յութուբյան» թողարկումներն եք նայում, իմ ներկայացումների տոմսերն եք գնում: Դրա համար ողջունում եմ ձեզ եւ ներողություն խնդրում տարիքիս համար, որովհետեւ մեր հայրերը մեզ շենացած երկիր ու տնտեսություն թողեցին, իսկ մենք ձեզ՝ այն, ինչ ունենք»:
Սերգեյ Դանիելյանը շեշտեց՝ ցույցերը խաղաղ պետք է լինեն. «Այդ դեպքում ոստիկանությունը մեր կողմը կանցնի: Ես հավատում եմ, որ ոչինչ իզուր չէ»: «Մերժիր Սերժին» նախաձեռնության անդամ Արմեն Գրիգորյանն էլ անդրադարձավ վարչապետ Սերժ Սարգսյանի այն հայտարարությանը, թե մայրաքաղաքում ընթացող ցույցերը դրական չեն անդրադառնում զբոսաշրջության վրա: «Մենք ավելի շատ լրագրող ենք բերել ՀՀ, քան Սերժ Սարգսյանը»,-ասաց Արմեն Գրիգորյանը:
Հավելենք, որ վաղը ցուցարարների գործողությունները կմեկնարկեն առավոտյան 8-ից. նախատեսվում է փողոցներ փակել բոլոր վարչական շրջաններում, նաեւ՝ բեռնատարների օգնությանը դիմել:
Լուիզա ՍՈՒՔԻԱՍՅԱՆ
