«Երդվում եմ՝ ոստիկանն ասաց՝ ես չեմ խփելու քո ընկերոջը, կներեք, որ հիմա ձեր կողքին չեմ, բայց ես ձեզնից մեկն եմ». «Իմ քայլը» նախաձեռնության անդամ

Ինչպես արդեն տեղեկացրել ենք Հանրապետության հրապարակում մեկնարկել է «Իմ քայլը» և «Մերժիր Սերժին» նախաձեռնությունների հանրահավաքը:

Հաշմանդամություն ունեցող անձ Արևիկ Մելքոնյանը հարթակից կոչ արեց իր ընկերներին և ընդհանրապես ՀՀ-ում հաշմանդամություն ունեցող բոլոր անձանց միանալ խաղաղ անհնազանդության այս պայքարին, քանի որ դա նաև իրենց պայքարն է. «Ես դուրս եմ եկել փողոց, քանի որ դժգոհ եմ այս իշխանություններից և Սերժ Սարգսյանից: Միշտ և ամեն քայլափոխի ոտնահարվում են իմ իրավունքները»:

«Իմ քայլը» նախաձեռնության անդամ Մխիթար Հայրապետյանը տեղեկացրեց, որ մարտի 31-ին մեկնել է Գյումրի և միացել Նիկոլ Փաշինյանին՝ անելու իր քայլը: Նա վստահեցրեց՝ այս շարժման շարժիչ ուժն ուսանողությունն է. «Մեր ուսանողության հետ կողք կողքի պայքարելը պատիվ է: Ես պարծենում եմ, դուք իմ պարծանքն ու հպարտությունն եք: Ինձ համար մեծ պատիվ է ձեզ հետ թև թևի մտած նստել փողոցների վրա և պահել մեկմեկու»:

Այնուհետև նա մի դրվագ ներկայացրեց այսօր Փեթակի դիմաց իրենց և ոստիկանների միջև տեղի ունեցած միջադեպից. «Ես և Վահան Կոստանյանը տեսանք, թե ինչպես են ոստիկանները փորձում ցրել ցուցարարներին ու տեսնելով, որ մեր ընկեր Մեսրոպ Պապիկյանը շրջափակման մեջ է, վազեցինք ու փորձում էին նրան ազատել ոստիկաններից:

Մեսրոպը գրկել էր ոստիկանին ու ասում էր ընկեր, ես քեզ սիրում եմ: Ես ինքս գնացի ոստիկանին մյուս կողմից գրկեցի ու ասացի, ընկերս, ընկերոջս չխփես, բերման ենթարկիր, բայց մի խփիր: Երդվում եմ՝ ոստիկանն ասաց՝ ես չեմ խփելու քո ընկերոջը, կներեք, որ հիմա ձեր կողքին չեմ, բայց ես ձեզնից մեկն եմ: Եվ միայն նա չէ այդպես մտածում: Ոստիկանների մեծ մասն արդեն զգում է, որ մեր մոտեցումն ու սերը շինծու չէ»:

Տաթև ՀԱՐՈՒԹՅՈՒՆՅԱՆ