Այսօր Արցախի խորհրդարանում տեղի է ունեցել հերթական լիագումար նիստը, որի օրակարգային հարցերից է եղել Արցախի նախագահի ամենամյա զեկույցը` նախորդ տարվա ծրագրի կատարման ընթացքի և արդյունքների, ինչպես նաև հաջորդ տարվա ծրագրի վերաբերյալ:
‹‹Մենք երկու օր առաջ տեղի ունեցած աշխատանքային խորհրդակցության ժամանակ ընդունել ենք հանրապետության նախագահի առաջարկը` Սահմանադրության 93-րդ հոդվածի համաձայն, հանրապետության նախագահի ամենամյա զեկույցը ԱԺ նիստի օրակարգում ընդգրկելու մասին››,- իր խոսքում ասաց խորհրդարանի նախագահ Աշոտ Ղուլյանը` հանրապետության նախագահի զեկույցը առաջին անգամ ԱԺ նիստի օրակարգում ընդգրկելը և դրան հաջորդող քննարկումը որակելով, որպես, հանրապետության նախագահի և խորհրդարանի միջև նոր մակարդակի փոխհարաբերությունների վկայություն:
Հանդես գալով զեկույցով` Բակո Սահակյանը մասնավորապես նշեց, որ բավականին մեծ թափով շարունակվել և շարունակվում է բանակաշինության գործընթացը բոլոր անհրաժեշտ ուղղություններով` ռազմատեխնիկական, քաղաքական, գաղափարախոսական, սոցիալ տնտեսական և այլ միջոցառումների իրականացմամբ: Նա նաև նշեց, որ մարտական և զորահավաքային պատրաստականության նպատակով շուտով կներդրվի ակտիվ պահեստազորի գաղափարը:
Արցախի նախագահը խոսեց նաև արտաքին աշխարհի հետ տնտեսական կապերի հաստատման մասին` կարևորելով Արցախի զարգացման համար արտաքին բարենպաստ պայմանների ստեղծումը և ներդրումների խրախուսումը:
‹‹Այդ նպատակով արտերկրի գործարար շրջանակներին կներկայացվեն Արցախի տնտեսական և սոցիալական ծրագրերը, հարկային բարենպաստ դաշտը և ներդրումային հնարավորությունները` հիմք ունենալով մեր երկրի համապատասխան կառույցների կողմից մշակված բիզնես ծրագրերը››,- նշեց Բակո Սահակյանը:
Նախագահը նաև ասաց, որ այս տարվա աշնանը նախատեսվում է Ստեփանակերտում անցկացնել տնտեսական խորհրդաժողով` տարբեր երկրների գործարար շրջանակների ներկայացուցիչների մասնակցությամբ:
‹‹Արտաքին քաղաքականության մեջ մեր հաջողությունների կարևորագույն գրավականներից եղել և մնում է Հայաստանի և Սփյուռքի հետ սերտ փոխգործակցության պահպանումը և համակարգված աշխատանքի իրականացումը, ինչպես նաև հավատարմությունը հավասարակշռվածության և բազմաուղղվածության սկզբունքներին››,- ընդգծեց Արցախի նախագահը:
Դավիթ ԱԲԱՂՅԱՆ
