«Դուք հո՞ իմ վերադասը չեք». Գյումրու թիվ 3 դպրոցի տնօրենը՝ ցուցարարներին

Այսօր գյումրեցի երիտասարդներն իրենց բողոքի ցույցը սկսեցին Վարդանանց հրապարակից, որտեղ գտնվող քաղաքապետարանի շենքում ընթանում էր ավագանու նիստը։ Ոստիկանները արագ շրջափակեցին շենքը, որպեսզի ցուցարարները հանկարծ ներս չմտնեն ու որևէ պահանջ չներկայացնեն։

Ցուցարարները շարժվեցին դեպի Գեղարվեստի ուսումնարան, որտեղ դռները դարձյալ փակ էին ցուցարարների առջև, այնուհետ ուղևորվեցին դեպի թիվ 3 դպրոց։

Թե ինչո՞ւ է դռները փակ, տնօրեն Կարեն Դարբինյանը մեկնաբանեց. «Ես թույլ չեմ տալիս դուրս գան, որովհետև ես երեխաների մասով պատասխան եմ տալիս իրենց օրինական ներկայացուցիչներին՝ ծնողներին։ Ես բոլոր ծնողների հետ ունեմ կնքված պայմանագիր։ Ձեր պահանջն անօրինական է, այն հակասում է դպրոցի ներքին կարգապահական պահանջներին»։

Ցուցարարները, որոնք նույնպես դպրոցականներ էին, տնօրենից պահանջեցին ցույց տալ պայմանագիրը ծնողների հետ, սակայն տնօրենը հրաժարվեց, ցուցարարները նաև հակադարձեցին, որ իրենք որևէ անօրինական պահանջ չեն ներկայացնում և որ տնօրենը լավ ծանոթ չէ ՀՀ օրենսդրությանը։ Դռները փակվեցին ցուցարարների առջև։

Այստեղ մի հուզիչ տեսարանի ականատես եղանք, հավաքված ցուցարարները խոնարհվեցին Թալիշում նահատակված Վիկտոր Յուզիխովիչի հուշաքարին ու բարձրաձայն կրկնեցին նրա վերջին խոսքերը. «Տղաներ, ինչ էլ որ լինի, հիշեք մեզ այնպիսին, ինչպիսին որ եղել ենք, վախը կյանքում տեղ չունի»։

Ցուցարարները շարժվեցին նաև մյուս դպրոցներ, սակայն դռները կողպված էին, իհարկե, աշակերտները պատուհաններից գրություններ էին ուղարկում, որ ուզում են միանալ անհնազանդության ակցիաներին, սակայն դռները փակել են իրենց վրա։

Նունե ԱՐԵՎՇԱՏՅԱՆ