9:20 Կառավարության երրորդ մասնաշենքը բացվեց, կառավարության աշխատակիցները «ամոթ» վանկարկումների ներքո ներս են մտնում, թեեւ այլ մուտքերով աշխատակիցներից ոմանք արդեն իսկ ներս էին մտել:
Նիկոլ Փաշինյանը կոչ արեց կառավարության աշխատակիցներին ներքին ստորագրահավաք սկսել այն մասին, որ իրենք չեն հնազանդվում, չեն ճանաչում Սերժ Սարգսյանի իշխանությունը, եւ ճանաչում են համաժողովրդական շարժման իշխանությունը: Նա նույնը կոչ արեց ոստիկանությանը;
«Եթե անգամ մեր դեմ բռնություն կիրառեք, մենք ձեզ բռնությամբ չենք պատասխանի»,-հայտարարեց Նիկոլ Փաշինյանը:
Նա պատմեց, որ իր ծանոթներից մեկը պատմել է, թե ինչպես է իր տան շինարարության վրա կարմիր բերետավոր աշխատում, ապա կոչ արեց. «Իշխանությունները միլիոնատեր են դառնում, իսկ դուք շաբաթ-կիրակի ցեմենտ-բետոն եք անում, մտածեք իրավիճակի մասին: Մտածեք, թե մեր ասածը ինչով է հակասում ձեր ընտանիքի շահերին, նոր ջարդուփշուր արեք: Մտածել ե՞ք, թե ինչ եկամուտներ է ստանում Սերժ Սարգսյանի ընտանիքը եւ դուք ինչքան աշխատավարձ եք ստանում»
Գոհար ՀԱԿՈԲՅԱՆ
