Նիկոլ Փաշինյանը հրապարակեց շարժման ռազմավարությունը. «Նստացույցեր արեք պետական գերատեսչություններում»

Հանրապետության հրապարակում ընթացող «Քայլ արա մերժիր Սերժին» խորագրով հանրահավաքում Նիկոլ Փաշինյանը ներկայացրեց թե ինչպե՞ս են պատկերացնում թավշյա հեղափոխության տրանսֆորմացիան իշխանափոխության:

Նա կոչ արեց` գյուղերի եւ փոքր քաղաքների բնակիչներին` ճնշումներ գործադրել գյուղապետերի, ավագանու անդամների, վարչական շրջանների ղեկավարների վրա եւ նրանց համոզել-պարտադրել`հանդես գալ թավշյա հեղափոխությանն աջակցելու մասին պաշտոնական հայտարարություններով: «Գնացեք գյուղապետարաններ, ավագանու անդամներից, որպես նրանց գործատուներ, պահանջեք, որ հանդես գան թավշյա հեղափոխությանը, համաժողովրդական շարժմանն աջակցելու մասին հայտարարություններով: Վաղվանից, այս հրապարակից պետք է կոնկրետ հայտարարություններ կարողանանք հրապարակել»,- ասաց նա`հավելելով, որ գյուղապետերի, քաղաքապետերի չեն զանգելու, «առեւտուր» չեն անելու, ժողովուրդը պետք է այդ գործն իրականացնի:

Իսկ մայրաքաղաքում պայքարն այսպես է շարունակվելու: Նա քաղաքացիներին կոչ է անում`եթե գործով գնում են նախարարություններ կամ այլ վարչական շենքեր, կամ գործ չունեն`մտնեն ու պաշտոնյաների սենյակում նստացույց անեն, որպեսզի «Սերժ Սարգսյանի պաշտոնյաների համար նստելու տեղ չմնա»: Սա է լինելու շարժման ռազմավարությունը: «Մենք պետք է այնպես անենք, որ նստելու տեղ չունենա անգամ ինքը`Սերժ Սարգսյանը: Նա ՀՀ-ում պետք է կաբինետ չունենա»,- ասաց Նիկոլ Փաշինյանը:

Որոշ դեպքերում, ասում է սա կարելի է անել քաղաքացիների նախաձեռնությամբ: Բայց, այդ դեպքում, ՀՀ ոստիկանությունը եւ ԱԱԾ-ն պետք է դադարեն ժողովրդից պաշտպանել որեւէ գերատեսչական շենք, քանի որ դրանք պատկանում են ՀՀ-ի եւ ժողովրդին: «Իշխանությունը խնդիր է դրել թշնամացնել ոստիկանությանն ու շարժման մասնակիցներին»,- հայտարարեց Նիկոլ Փաշինյանը`հիշեցնելով, որ դեռ երեկվա հանրահավաքում էր ինքը հայտարարել`շարժման շարքերում ներդրվել են «շմայսական բրիգադներ», որոնց հիմնական խնդիրն է սադրել բախումներ`ոստիկանության հետ: Ասում է`Սերժ Սարգսյանն անհանգստացած է այն հռետորաբանությունից, որ ունեն հավաքի մասնակիցները` ոստիկանի հետ խնդիր չունենք:

«Ոստիկանը մերն ա»,-վանկարկեցին հավաքվածները: «Մենք չենք եկել ՀՀ ոստիկանության սերժանտ Սերժ Սարգսյանի դեմ կռիվ տալու, մենք եկել ենք ՀՀ իշխանությունը բռնազավթած Սերժ Սարգսյանի դեմ կռիվ տալու: Կան ուժեր, որոնք ուզում են մեր շարժման սլաքները Սերժ Սարգսյանից ուղղել սերժանտ Սարգսյան: Հենց սերժանտը հասկացավ, որ մեր կռիվը նաեւ իր եւ իր երեխայի ապագայի համար է, դադարելու է պաշտպանել Սերժ Սարգսյանին»,- շարունակեց Նիկոլ Փաշինյանը:

Հրապարակում ամոթանքներ հնչեցին նաեւ Հայաստանի հանրային հեռուստաընկերությանն ուղղված: Նիկոլ Փաշինյանը հայտարարեց`շարժումը գտնվում է միջազգային լրատվամիջոցների ուշադրության կենտրոնում, բայց «Հ 1»-ը չի անդրադարձել:

Այդ ընթացքում հավաքվածները վանկարկեցին`«ամոթ, ամոթ»:

Բանախոսը նկատեց` հավաքին անդրադարձել են ՌԴ նախագահի աշխատակազմը, ԱՄՆ Պետդեպը, երեկվա հանրահավաքն ինտերնետում հինգ միլիոնից ավելի դիտում է ունեցել, իսկ հայաստանյան լրահոսի թիվ մեկ իրադարձությունը ոչ թե Սերժ Սարգսյանի «վարչապետ կարգվելն» է եղել, այլ թավշյա հեղափոխության շարժումը:

Նիկոլ Փաշինյանն ասում է, որ նամակներ է ստանում Հայաստանից 10-15 տարի առաջ արտագաղթածներից`նրանք տոմս են գնում եւ վերադառնում`«համաժողովրդական հաղթանակին» մասնակցելու համար:

Նելլի ԳՐԻԳՈՐՅԱՆ