Հայաստանում հեղափոխություն է հասունանում. միջազգային մամուլ

Հայաստանի մայրաքաղաք Երևանում տասնյակ մարդիկ են ձերբակալվել նախկին նախագահի՝ իշխանությունը կրկին զավթելու դեմ բողոքի ակցիաների ժամանակ, գրում է The Time-ը:

63-ամյա Սերժ Սարգսյանը, որը ստանում է Մոսկվայի աջակցությունը, իր պաշտոնավարման երկրորդ ժամկետն ավարտել է անցյալ շաբաթ, բայց երեկ խորհրդարանի կողմից ընտրվել է երկրի վարչապետ:

Սարգսյանը վարչապետի միակ թեկնածուն էր: Նրա քննադատներն ասում են, որ նա պարզապես նախագահի լիազորությունների մեծ մասը փոխանցել է վարչապետի գրասենյակին, գրում է թերթը:

National Public Radio-ի կայքն էլ գրում է, որ Երևանում փողոց են դուրս եկել հազարավոր մարդիկ, որոնց նպատակը, սակայն, նոր պաշտոնում Սերժ Սարգսյանին շնորհավորելը չէ:

Քաղաքացիների այդ տեսակետը չեն կիսում Հայաստանի խորհրդարանի օրենսդիրները, որոնք քվեարկել են նախկին նախագահին վարչապետի պաշտոնում հաստատելու օգտին, գրում է կայքը: Հաշվի առնելով գործադիրի պաշտոնում պաշտոնավարելու ժամկետների սահմանափակումները՝ Սարգսյանն ավելի վաղ էր քայլ կատարել՝ երկրորդ ժամկետի ավարտին ցած դնելով նախագահի լիազորությունները: Մինչդեռ աշխատանքի անվան փոփոխությունը չի նշանակում իշխանական լծակների թուլացում, գրում է կայքը:

Գերմանական Neue Zürcher Zeitung պարբերականը գրում է, որ նախկին նախագահի վերարտադրման դեմ Հայաստանի բնակիչների բողոքում արտացոլված է Հայաստանի վարած քաղաքականության նկատմամբ ընդհանուր դժգոհություն:

Պարբերականը նկատում է, որ ի տարբերություն նախագահի պաշտոնի՝ վարչապետի պաշտոնում Սերժ Սարգսյանը կարող է պաշտոնավարել ավելի երկար, քանի դեռ անհրաժեշտ ձայներ կստանա խորհրդարանից:

Պատրաստեց՝ Վիկտորյա ԱՆԴՐԵԱՍՅԱՆԸ