Ապրիլի 16-ին Կորյուն-Հերացի փողոցների խաչմերուկում բախում տեղի ունեցավ ցուցարարների եւ 62ss465 պետհամարանիշով մեքենայի վարորդի միջեւ: Այդ մեքենայի վարորդն ու ուղեւորները հարձակվեցին ուսանողների վրա, հարվածներ հասցրեցին նրանց եւ նստելով մեքենան հեռացան։ Ոստիկանները չմիջամտեցին միջադեպին:
Ավելի ուշ հայտնի դարձավ, որ ակտիվիստներին հարվածողը Մասիսի ՀՀԿ-ական քաղաքապետ Դավիթ Համբարձումյանի եղբայրն է՝ Գոռ Համբարձումյանը: Նա ոստիկանապետ Վլադիմիր Գասպարյանի թիկնազորի պետ Արշակ Հակոբյանի փեսան է:
Հիշեցնենք, որ ընդամենը ամիսներ առաջ՝ անցյալ տարվա օգոստոսին, Գոռ Համբարձումյանի անունը կրկին շրջանառվեց Մասիս քաղաքի հրապարակի սրճարաններից մեկում տեղի ունեցած մի աղմկահարույց միջադեպում:
Ըստ մամուլի հրապարակումների, մի խումբ երիտասարդների մասնակցությամբ վիճաբանություն էր տեղի ունեցել, որի հետեւանքով քաղաքապետի մերձավորները վիճաբանող մյուս կողմից մի քանիսին դանակահարել էին՝ հասցնելով տարբեր աստիճանի մարմնական վնասվածքներ, մյուսներն էլ գլխի շրջանում ծանր վնասվածքներ էին ստացել:
ՀՀ ոստիկանության հասարակայնության հետ կապերի եւ լրատվության վարչությունից միջադեպի լուրը հաստատել էին՝ սակայն նշել, որ իրենց միջադեպի մասնակիցներից միայն երկուսի անունն է հայտնի. «Ըստ տեղեկությունների, վիճաբանության ընթացքում փոխադարձ հարվածներ են հասցրել միմյանց, պատճառելով վնասվածքներ, նյութեր են նախապատրաստվում»,- փոխանցել էին ոստիկանությունից:
Լուսինե ԲՈՒԴԱՂՅԱՆ
