Հայտնել ենք, որ ապրիլի 12-ին Տավուշի մարզի Բերդի տարածաշրջանի սահմանամերձ Այգեձոր գյուղի բնակիչներ, 36-ամյա Նվեր Սուրենի Ճուղուրյանը, նրա կինը`32-ամյա Աստղիկ Արարատի Պետրոսյանը, նույն գյուղի բնակիչ, 37-ամյա Արամ Սերյոժայի Դալլաքյանը եւ Այգեձորի եւս մի բնակիչ գնացել են գյուղից 5 կմ հեռավորությամբ գտնվող սահմանամերձ տարածք՝ սինդրիկ հավաքելու, նրանցից 3-ը հակահետեւակային ականների պայթյունից վիրավորվել են: Ամպուտացվել են Նվեր Ճուղուրյանի ձեռքը` բազկի ստորին երրորդականից, Աստղիկ Պետրոսյանի եւ Արամ Դալլաքյանի մեկական ոտքը` սրունքի ստորին երրորդականից:
Այսօր զանգահարեցինք Բերդի զինվորական հոսպիտալի պետ Էդուարդ Գրիգորյանին: Նա ասաց, որ վիրավորները շարունակում են բուժում ստանալ հոսպիտալում, ինքը նամակ է ուղարկել պաշտպանության նախարարություն,որպեսզի նրանց բուժումը կատարվի պետպատվերի շրջանակներում եւ կարծում է, որ այդպես էլ կլինի:
Վիրավորների ինքնազգացողության մասին մեր հարցին ի պատասխան Է. Գրիգորյանը հայտնեց, որ նրանց վիճակը նորմալ է, ասելով`ուտում են, խմում եւ ծիծաղում:
Ոսկան ՍԱՐԳՍՅԱՆ
