12:00 Ֆրանսիայի հրապարակի հարակից մայթեզրերը շրջափակված են վահանավոր ոստիկաններով: Հետիոտնային շարժը եւ երթեւեկությունը մասնակի վերականգնված են: Սերժ Սարգսյանի` վարչապետ ընտրվելու դեմ հանդես եկող ցուցարարները պատգամավոր Նիկոլ Փաշինյանի առաջնորդությամբ երթ են իրականացնում Մաշտոցի պողոտայով: Ֆրանսիայի հրապարակում լրացուցիչ ոստիկանական ուժեր են կուտակվում:
12:05-«Եղբա՜յր, հանի դիմակդ»,-դիմելով երիտասարդ-ցուցարարին՝ ասում է Նիկոլ Փաշինյանը: Նա ավելի վաղ հայտարարել էր, որ դիմակով չի կարելի ցույցի մասնակցել, քանի որ իրենք թաքցնելու ոչինչ չունեն:
12:10-Ցուցարարների երթի ուղղությունը փոխվեց. այն շարունակվում է արդեն Չարենցի փողոցով: «Սա երթ է, ոչ թե մարաթոնյան վազք»,-ցուցարարներին դիմում է Նիկոլ Փաշինյանը՝ հորդորելով դանդաղ քայլել:
12:15-Ինչպես ապրիլի 13-ին, քիչ առաջ եւս ցուցարարները մտան ԵՊՀ շենքի տարածք: «Կոչ ենք անում դասադուլ անել, դուրս գալ փողոց եւ տեր կանգնել քո իրավունքներին»,-ուսանողներին ԵՊՀ բակում բարձրախոսով դիմեց Նիկոլ Փաշինյանը: Ռեկտորատի շենքի դիմացի հատվածում Փաշինյանը հայտարարեց, որ փոքրիկ հավաք են նախատեսում:
Լուիզա ՍՈՒՔԻԱՍՅԱՆ
