Aravot.am-ը Մ. Հերացու անվան պետական բժշկական համալսարանից հետաքրքրվեց, թե քանի տոկոս է ուսանողների հաճախելիությունը եւ արդյոք դասադուլի մե՞ջ են ուսանողները:
«Այսօր մյուս օրերի համեմատ, ժամը 12.00-ի դրությամբ ԵՊԲՀ-ում նկատվում էր ուսանողների համեմատաբար քիչ հաճախելիություն: Ֆակուլտետների դեկանատների համապատասխան աշխատակիցները խոսել են ուսանողների ծնողների հետ, համեմատաբար քիչ հաճախելիության պատճառը պայմանավորված է տրանսպորտի հետ կապված խնդիրներով, ինչպես նաև ծնողների՝ երեխաների անվտանգության հետ կապված մտահոգությամբ:
Անգամ եղել է ծնողի կողմից զանգ Հնդկաստանից, որը մտահոգություն է հայտնել ստեղծված իրավիճակի հետ կապված: Նշենք, որ երեկ մի ուսանող, որը չէր մասնակցում ցույցին, սակայն գտնվում էր համալսարանական տարածքում, դեմքի շրջանում վնասվածք է ստացել: Արդեն օրվա երկրորդ կեսից ուսանողների հաճախելիության շատացում է նկատվում, մոտ 30 տոկոսով:
Բժշկական համալսարանն աշխատում է, ուսումնական գործընթացը շարունակվում է բնականոն ռեժիմով, անգամ երեկ մեկնարկել է առաջատար բժիշկ-գիտնականների մասնակցությամբ իմունաախտորոշման և իմունոթերապիայի արդի խնդիրներին նվիրված գիտաժողովը, որն անցնում է լեցուն դահլիճներում»,- հայտնեցին Բժշկական համալսարանի լրատվականից:
Գոհար ՀԱԿՈԲՅԱՆ
