Իրավապաշտպան Արթուր Սաքունցը, որը նույնպես մասնակցում է «Իմ քայլը» նախաձեռնության հանրահավաքին, այսօր 1in.am-ի հետ զրույցում ասաց, որ ոստիկանությունը իրավունք չունի խաղաղ ցույցը ցրելու որոշում կայացնի, իսկ երեկվա հատուկ միջոցների կիրառումն անթույլատրելի համարեց:
Ըստ նրա, նախ՝ ոստիկանությունը պիտի պարզաբանի, թե երեկ հատուկ միջոցների կիրառումը ինչով էր պայմանավորված. «Ինքը կիրառեց միջոցներ բոլորի նկատմամբ, ինքը պիտի առանձնացնի այն քաղաքացիներին, որոնք խախտել են օրենքը, բռնություն են գործադրել, բայց ոստիկանությունը հատուկ միջոցները բոլորի նկատմամբ կիրառեց»:
Արթուր Սաքունցի խոսքով, ոստիկանությունը լավ կանի զբաղվեի այն մարդկանց հայտնաբերմամբ, որոնք օրենք են խախտում»:
Ինչ վերաբերում է ոստիկանության այն պատճառաբանությանը, թե երթի մասնակիցները խախտում են այլ քաղաքացիների ազատ տեղաշարժը, ապա Արթուր Սաքունցն ասաց, որ հավաքների ազատությունը պետական նշանակության հարց է բարձրացնում եւ այլ ժամանակավոր սահմանափակումը թույլատրելի է, քանի որ հանրային գերակա շահ է. «Հանրային գերակա շահը միայն մարդկանց ունեզրկելը չէ»:
Լուսինե ԲՈՒԴԱՂՅԱՆ
