ԱԺ «Ելք» խմբակցության պատգամավոր, «Հանրապետություն» կուսակցության նախագահ Արամ Սարգսյանը խորհրդարանում լրագրողների հետ զրույցում արձագանքելով իրեն դավաճան անվանող որակումներին, ասաց, որ իրեն դավաճան անվանելու համար պետք է շատ մեծ երեւակայություն ունենալ: Նման մարդկանց նա խորհուրդ է տալիս նկարչությամբ կամ արվեստով զբաղվել:
«Ելք» խմբակցության «Հանրապետություն» եւ «Լուսավոր Հայաստան» կուսակցությունները նախապես հայտարարել էին, որ խորհրդարանում Սերժ Սարգսյանի ընտրության ժամանակ ելույթներ են ունենալու եւ արտահայտելու են իրենց ողջ ասելիքը:
Այսօր Արամ Սարգսյանն ասաց, որ գրանցման պահին ինքը նիստերի դահլիճ չի մտնելու, նիստի ընթացքում կմտնի, որպեսզի թույլ չտա, որ Հայաստանը դառնա Ղազախստան կամ Հյուսիսային Կորեա. «որ մենակ իր սրտին դուր եկած հարցեր ու ելույթներ չլինեն»: Արամ Սարգսյանն, ի դեպ, չի բացառում, որ դրսի իրենց գործընկերները նույնպես մտնեն խորհրդարանի շենք:
Հիշեցնում է՝ «այս շենքը շատ բաներ է տեսել, ընդհուպ մինչեւ ահաբեկչություն»:
Լրագրողներից մեկը հետաքրքրվեց՝ ինչո՞ւ, այդուհանդերձ, իրենք որոշեցին մասնակցել խորհրդարանի նիստին: Արամ Սարգսյանը հիշեցրեց, որ դաշինքում ի սկզբանե էլ այդ հարցի շուրջ կոնսենսուս չի եղել եւ պարզաբանել են, թե ինչու: «Մենք ասել ենք նաեւ, որ եթե ժողովրդի վրա ուժ կիրառվի՝ մենք կգանք եւ կկանգնենք ժողովրդի կողքին, ինչը նաեւ արել ենք: Բայց մենք մնացել ենք մեր տեսակետին, մեր դեմ լինելը արտահայտելու ենք խորհրդարանում»,- ասաց Արամ Սարգսյանը:
Նելլի ԳՐԻԳՈՐՅԱՆ
