«Ոստիկաններն օգտագործել են լուսաձայնային նռնակներ, ոստիկանությանը կոչ եմ անում այդ չարիքը չօգտագործել, որովհետեւ բազմաթիվ դեպքերում մարդկային զոհեր են եղել»,- այսօր հայտարարեց ԱԺ պատգամավոր Նիկոլ Փաշինյանը:
Անդրադառնալով մամուլի հրապարակումներին, թե Արցախից զորքեր են Երեւան բերում՝ Նիկոլ Փաշինյանն ասաց՝ վերջ տվեք. «Ղարաբաղի զորքն առաջնագիծ ունի եւ այդ առաջնագծի պահպանությամբ է զբաղվում, ես համոզված եմ, որ Ղարաբաղի իշխանությունը նման որոշում չի կարող կայացնել, որովհետեւ դա կնշանակի թուլացնել առաջնագիծը»:
Հարցին, թե մտավախություն չունե՞ք, որ ոստիկանության՝ ցույցերը ցրելու մասին որոշումից հետո ձեզ կարող են զրկել անձեռնմխելիությունից, Նիկոլ Փաշինյանը պատասխանեց, որ ցանցային գործողություն է տեղի ունենում, եւ ինքն ասել է՝ որ պարագայում իրեն կարող են ձերբակալել. «Թող ինձ ձերբակալեն: Փակեք բոլոր գերատեսչությունների շենքերը, շրջափակեք, հատուկ միջոցներ են կիրառում մտեք մարզպետարանների, գյուղապետարանների շենքեր»:
Ցուցարարներից մեկն էլ Նիկոլ Փաշինյանին հայտնեց, որ քիչ առաջ ոստիկանները Երիտասարդական մետրոյի հարեւանությամբ գործող սուպերմարկետի մոտից ավտոբուսներով բերման են ենթարկել երիտասարդ ցուցարարների:
Արփինե ՍԻՄՈՆՅԱՆ
