Այսօր գրոսմայստերներ Զավեն Անդրիասյանը եւ Սամվել Տեր-Սահակյանը, որոնք օրերս «Հայկական Արծիվներ» ակումբի կազմում հաղթող էին դարձել Chess.com ինտերնետային պորտալի կազմակերպած PRO Chess League միջազգային թիմային մրցաշարում, լրագրողների հետ հանդիպմանը տեղեկացրին, որ իրենց թիմն, ըստ էության, կազմավորվել էր հանպատրաստից:
«Մրցաշարը մեզ համար սկսվեց անհաջող՝ պարտվեցինք հետնապահին, որովհետեւ այնքան էլ ուժեղ կազմ չէինք ներկայացրել: Հետո մեզ միացավ Հրանտ Մելքումյանը, եկան հաղթանակները եւ կարողացանք մտնել եզրափակիչ՝ շրջանցելով այնպիսի թիմերի, որոնց կազմում հանդես էին գալիս Մագնուս Կարլսենը, Ֆաբիանո Կարուանան, Վիշվանաթան Անանդը եւ ուժեղագույն այլ գրոսմայստերներ», – ասացին բանախոսները: Նրանք նաեւ նշեցին, որ սկզբնական շրջանում պարզապես ցանկություն ունեին ներկայացնել հայկական թիմ, որի անվանման մեջ անպայման լիներ Armenia անունը եւ հայկական որեւէ խորհրդանիշ՝ Արծիվը, որը մեր ուժի խորհրդանիշերից է, ինչը կապ չունի «Հայոց Արծիվների» հետ: Իսկ ահա մրցաշարի վերջնահատվածում արդեն հաղթելու նպատակ էին դրել:
Աշոտ ՀԱԿՈԲՅԱՆ
