Թեժ բանավեճ նախկին պատգամավորների միջեւ
-Իմ գրաված տարածքը դուք հանձնել եք:
-Այդ ժամանակահատվածում մենք պահել ենք եղածը…
-Լավ չեք պահել, գողացել են, տարել են 800 հեկտարը:
-Դա ճիշտ գնահատական չի: Շատ երկրներ այսօր կորցրեցին՝ Վրաստանը կորցրեց Աբխազիան… մենք մեր տղաների կյանքի գնով, մեր բանակով…
– Հիմա լա՞վ է, որ կորցրեցինք 800 հեկտարը, ես ասում եմ՝ վատ է:
-Լավի ու վատի խնդիրը չի, կարող էր ավելի շատ հանձնվել:
-Իհարկե, կարող էր, չկարողացաք, էդքան բաշարեցիք: Ուժներդ չպատեց շատ հանձնեիք, բանակը չհամաձայնվեց:
-Ես բացարձակ համամիտ չեմ ձեր գնահատականների հետ: Դա լուրջ հերոսամարտ էր եւ դրա գնահատականն այդ կերպ տալը՝ ճիշտ չեմ համարում:
Այս երկխոսությունն այսօր «Հայելի» մամուլի ակումբում ընթացավ ԳԽ նախկին պատգամավոր Ազատ Արշակյանի եւ նախկին պատգամավոր, իշխող ՀՀԿ-ի խորհրդի անդամ Լեռնիկ Ալեքսանյանի միջեւ:
Լեռնիկ Ալեքսանյանը հիմնավորում էր ՀՀԿ-ի որոշումը՝ Սերժ Սարգսյանին վարչապետի պաշտոնում առաջադրելու մասին: Նա սին է համարում կարծիքները, որ ՀՀԿ-ում չկան մարդիկ, կադրեր: Համաձայն էլ չի, որ Սահմանադրական փոփոխությունները երկրի նախագահի վերարտադրման համար էին: Ասում է՝ ավելի կարճ եւ փափուկ ճանապարհներ կային:
«Գործ է սկսվել, նաեւ Սերժ Սարգսյանի անձնական պատասխանատվությամբ, համակարգ է փոխվում: Այստեղ նաեւ պատասխանատվության խնդիր է»,- ասում է իշխող ուժի ներկայացուցիչը՝ հավելելով, որ գնահատականը պետք է տալ առ ժամանակ հետո եւ համեմատության մեջ: Հավելում է՝ ՀՀԿ-ի արած դրականը նաեւ հասարակության մեջ են տեսնում, ովքեր վատատես չեն, նաեւ միջազգային կառույցները: Բայց նաեւ բնական է համարում, որ ընդդիմադիրները բացասականն են տեսնում: Ինքն էլ իբրեւ ՀՀԿ-ի ներկայացուցիչ չի ասում, որ ամեն ինչ լավ է. «Բացթողումները լուծվելու են, դրա համար են նաեւ համակարգային ու կադրային փոփոխությունները»:
Ազատ Արշակյանը պնդեց իր տեսակետը՝ «մենք գրավել էինք, 20 տարի պահել էինք, դուք հանձնեցիք: Երբ ՀՀԿ-ն 4 պատգամավոր ուներ մենք գրավում էինք, իսկ երբ դուք 400-ն ունեցաք՝ հանձնում ենք»: «Հարցադրման մեջ պրովոկացիոն բան եմ տեսնում: Այն ժամանակ գրավելով անվտանգության գոտին էինք ապահովում: Ղարաբաղի հարցը եկեք չշահարկենք»,- ասաց Լեռնիկ Ալեքսանյանը: «Անվտանգության գոտին դուք եվրոպաներում կասեք: Դուք լի էիք կորցնում, գնացինք կանգնեցինք՝ չթողեցինք»,- շարունակեց հակադրվել Ազատ Արշակյանը:
Հետո բանավեճն անցավ ԵԱՏՄ-ին. Լեռնիկ Ալեքսանյանը համամիտ չէ Ազատ Արշակյանի հետ, որ դա հետադիմություն էր եւ մենք ֆեոդալիզմ գնացինք: Ազատ Արշակյանի դիտարկմանը՝ Նազարբաեւը, Լուկաշենկոն, Պուտինը ֆեոդալներ են, հարցով հակադարձեց՝ մենք ի՞նչ ենք, եվրոպացի՞ ենք:
«Եվրոպացի ենք՝ ձեզ հանած: ՀՀ-ից հանած ՀՀԿ ղեկավարությանը՝ Հայաստանը առաջադեմ, ժողովրդավարություն սիրող երկիր է»,- ասաց Ազատ Արշակյանը:
Լեռնիկ Ալեքսանյանն առաջարկեց՝ տարբերել պետությունը՝ հասարակությունից ու ասաց, որ պետություն ենք ունեցել, նոր ենք սովորում: «20 տարի շատ լավ պահում էինք, հենց դուք եկաք՝ սկսվեց»,- իր կարծիքը պնդեց Ազատ Արշակյանը:
Լեռնիկ Ալեքսանյանը կարծում է, որ մենք լավ հայր, լավ զինվոր կարող է լինեք, բայց վատ քաղաքացի ենք: Ասում է՝ կոռուպցիայի մասին ենք խոսում, բայց ավտոտեսուչների ու վարորդի դասական դարձած խոսակցությունն է հիշեցնում: Հակադարձելով այն թեզին, որ եթե ԵԱՏՄ-ում չլինեինք ապրիլյան պատերազմում 800 հեկտար հող չէինք կորցնի, Լեռնիկ Ալեքսանյանը բերեց Վրաստանի օրինակը, որն ընտրեց ԵՄ-ն եւ ամբողջ Աբխազիան ու Օսեթիան կորցրեց:
Նելլի ԳՐԻԳՈՐՅԱՆ
