Շամիրամ գյուղի սգո սրահում 2017 թվականին 4 եզդիների սպանության գործով այսօր Արագածոտնի մարզի ընդհանուր իրավասության դատարանը ներգրավեց հանրային պաշտպան Ինգա Աղաջանյանին:
Հիշեցնենք, որ սպանությունը կատարելու մեջ մեղադրվող Թելման Քալաշյանի պաշտպանը՝ Կրոմվել Գրիգորյանն արդեն մի քանի նիստ է՝ չի ներկայանում դատարան:
Թեեւ անցած նիստին Քալաշյանը հրաժարվեց հանրային պաշտպանից, բայց դատարանն այսօր նոր պաշտպանի ներգրավեց: Վերջինս էլ գործի նյութերին ծանոթանալու համար միջնորդեց նիստը հետաձգել 10 աշխատանքային օրով, ինչը դատարանը բավարարեց:
Ի դեպ, Կրոմվել Գրիգորյանը թեեւ այսօր չէր ներկայացել, բայց գրավոր միջնորդություն էր ներկայացրել՝ խնդրելով նիստը հետաձգել՝ մեկ այլ նիստով զբաղված լինելու պատճառաբանությամբ:
Հաջորդ դատական նիստը նշանակվեց ապրիլի 27-ին:
Հիշեցնենք, որ Թելման Քալաշյանին մեղադրանք է առաջադրվել, որ նա 2017թ. օգոստոսի 1-ին Արագածոտնի մարզի Շամիրամ համայնքի գերեզմանատանը կից սգո սրահում, շատերի կյանքի համար վտանգավոր եղանակով կատարել է չորս անձանց սպանություն, բացի այդ, 1999թ. ապօրինի կերպով ձեռք է բերել, պահել հրազեն եւ ռազմամթերք, 2012թ. դեկտեմբերից մինչեւ 2014թ. նոյեմբերն ընկած ժամանակահատվածում կատարել է վաշխառություն` որի հետեւանքով տուժողներն ընկել են նյութական ծանր կացության մեջ, 25.08.2017թ. կատարել է նաեւ սուտ մատնություն: Թելման Քալաշյանի հորեղբորը՝ Քյարամ Քալաշյանին մեղադրանք է առաջադրվել այն բանի համար, որ նա պարտակել է առանձնապես ծանր հանցագործությունը` շատերի կյանքի համար վտանգավոր եղանակով, չորս անձանց սպանությունն իրականացրած Թելման Քալաշյանին: Թելման Քալաշյանին մեղադրանք է առաջադրվել՝ ՀՀ քրեական օրենսգրքի 104-րդ հոդվածի 2-րդ մասի 1-ին, 6-րդ կետերով, 213-րդ հոդվածի 2-րդ մասի 1-ին կետով, 235-րդ հոդվածի 1-ին մասով եւ 333-րդ հոդվածի 1-ին մասով, իսկ հորեղբորը՝ ՀՀ քրեական օրենսգրքի՝ 334-րդ հոդվածի 1-ին մասով: Նրանց նկատմամբ որպես խափանման միջոց է ընտրվել կալանավորումը:
Արփինե ՍԻՄՈՆՅԱՆ
