Հատված «Ծառուկյան» խմբակցության անդամ ՆԱԻՐԱ ԶՈՀՐԱԲՅԱՆԻ հետ զրույցից:
–Խորհրդարանու՞մ եք տեսնում ձեր պայքարը, թե՞ նաև փողոցում:
-Ինձ համար ընդունելի է պայքարի ցանկացած օրինական ձև, այլ հարց է, թե այս փուլում պայքարի որ ձևն է առավել օպտիմալ կամ արդյունավետ: Եթե այս փուլում խորհրդարանում պայքարի մեխանիզմներն առավել արդյունավետ են, քան դրսում, որովհետև հանրությունն ակտիվ չի արձագանքում փողոցի պայքարին, ուրեմն պետք է ընտրել պայքարի խորհրդարանական լծակները: Որ պահին կտեսնենք, որ խորհրդարանից դուրս պայքարը կլինի շատ ավելի արդյունավետ, կբերի իսկապես փոփոխությունների, ոչ թե միայն աղմուկի, բնականաբար կընտրենք այդ տարբերակը: Մենք երբեք չենք ասել, որ փողոցում պայքարելու ձևը մեզ համար միանգամայն մերժելի է: Ոչ: Ցանկացած ժամանակահատվածում պետք է ելնել «ռեալ պոլիտիկից», հաշվի առնելով, թե տվյալ ժամանակահատվածում խնդիրներ բարձրացնելու որ ձևն է առավել օպտիմալ: Ինքնանպատակ պայքարի այս կամ այն ձևից օգտվելը համարում ենք ընդդիմության մանկական հիվանդություն: Պետք է պայքարի տվյալ ժամանակահատվածի համար ճիշտ մարտավարություն մշակել:
–Հայաստանյան ընդդիմության անհաջողություններն ու ձախողումները ոչ ճիշտ քաղաքականության հետևա՞նք են:
-Չէի որակի որպես ձախողումներ, պարզապես ժամանակի հետ շատ ավելի ճիշտ ես գնահատում, թե տվյալ փուլի համար քո արսենալի որ գործիքներն են առավել արդյունավետ: Կրկնում եմ, մեզ համար երբեք մերժելի չի եղել փողոցի պայքարը: Դուք նաև տեսել եք, թե որքան ժողովուրդ կարող են փողոց բերել ԲՀԿ-ն և Գագիկ Ծառուկյանը: Պարզապես այսօր կարծում ենք, որ 31 պատգամավոր ունեցող խմբակցության համար այս փուլում խորհրդարանի հարթակն օգտագործելն ավելի նպատակահարմար է: Վաղն ինչ որոշում կկայացնենք, կերևա վաղը:
Զրույցը՝ Ռուզան ԽԱՉԱՏՐՅԱՆԻ
Հարցազրույցն ամբողջությամբ՝ «Իրատես» թերթի այսօրվա համարում
