Ազատ ոճի ըմբշամարտի Հայաստանի ազգային հավաքականի գլխավոր մարզիչ Հաբեթնակ Կուրղինյանը Aravot.am-ի հետ զրույցում խոսելով ապրիլի 30-ից մայիսի 6-ը Կասպիյսկում կայանալիք Եվրոպայի առաջնության մասին՝ ասաց, որ ուսումնամարզական հավաքն Օլիմպավանում արդեն ավարտվել է: «Հավաքը լիովին ծառայեց նպատակին: Տղաների մարզավիճակը նորմալ է, տրամադրությունը՝ բարձր: Կարեւոր է, որ վնասվածքներ չկան: Հիմա նրանց մի փոքր հանգստանալու հնարավորություն ենք տվել, որից հետո վերջին ուսումնամարզական հավաքը կանցկացնենք Վլադիկավկազում ու այնտեղից էլ կմեկնենք Կասպիյսկ», – ասաց գլխավոր մարզիչը:
Հարցին, թե ինչ ակնկալիքներ ունի, Հաբեթնակ Կուրղինյանը պատասխանեց. «Նախապես այդ մասին եկեք չխոսենք: Մրցագորգը կպատասխանի բոլոր հարցերին: Կրկնում եմ՝ տղաները լավ են մարզվել: Միայն կասեմ, որ բոլորն էլ պայքարելու են»:
Աշոտ ՀԱԿՈԲՅԱՆ
